ବର୍ତ୍ତମାନ ଜେଲରୁ ଖସି ପଳାଉଥିବା କଏଦୀଙ୍କୁ ନଜର ରଖିବା ସହଜ ହେବ। ଆଉ ସହଜରେ ଖସିକି ଯାଇ ପାରିବେ ନାହିଁ। କାରଣ ଖୁବଶୀଘ୍ର କଏଦୀମାନଙ୍କ ଉପରେ ନଜର ରଖିବା ପାଇଁ ଆସିପାରେ ହାଇଟେକ୍ ଟେକନୋଲୋଜି । ଏଣିକି କଏଦୀଙ୍କ ଦେହରେ ଜିପିଏସ ସିଷ୍ଟମ ଲାଗୁ କରିବା ପାଇଁ ଜେଲ୍ ର କର୍ତ୍ତୃପକ୍ଷ ବିଭାଗ ଚିନ୍ତା କରୁଛି । ତେବେ ଏହାଦ୍ୱାରା ଜେଲରେ କଏଦୀମାନଙ୍କ ବୋଝ ମଧ୍ୟ କମ୍ ହୋଇପାରିବ । ଏହାଦ୍ୱାରା ଜେଲର ଚାରିକାନ୍ଥ ଭିତରେ ଲୁଚି ରହିପାରିବେନି କଏଦୀ । କଏଦୀଙ୍କୁ ନେଇ ଏଭଳି କିଛି ନୂଆ ପ୍ରସ୍ତାବ ଦେଇଛି ଜେଲ୍ ବିଭାଗ ।
ତେବେ ସାଧାରଣ ଅପରାଧରେ ସମ୍ପୃକ୍ତ କଏଦୀଙ୍କଠାରେ ଏହି ଜିପିଏସ ସିଷ୍ଟମ ଲାଗୁ କରାଯିବ । ବିଶେଷ କରି ୭ ବର୍ଷରୁ କମ୍ ସଜା ହେବାକୁ ଥିବା କଏଦୀମାନଙ୍କ ଦେହରେ ଲାଗିବ ଏହି ଜିପିଏସ ଟ୍ରାକର୍ । ଏହାପରେ ସେମାନଙ୍କୁ ଜେଲର ଚାରିକାନ୍ଥ ଭିତରେ ରଖିବାକୁ ପଡ଼ିବ ନାହିଁ । ସୁଚନା ଅନୁସାରେ ଜିପିଏସ ଲଗାଯିବା ପରେ ଏହି ଅପରାଧୀମାନଙ୍କୁ ଘରକୁ ଛାଡ଼ି ଦେବା ପାଇଁ ପ୍ରସ୍ତାବ ଦେଇଛି ଜେଲ୍ ବିଭାଗ ।
ଜେଲ୍ ବିଭାଗ ତରଫରୁ ଦିଆଯାଇଥିବା ପ୍ରସ୍ତାବ ଅନୁସାରେ, କଏଦୀମାନଙ୍କ ଆଣ୍ଠୁରେ ଜିପିଏସ ଲଗାଇ ସେମାନଙ୍କୁ ଘରକୁ ଛାଡ଼ି ଦିଆଯିବ । ତେବେ ସେମାନଙ୍କ ଆଣ୍ଠୁରେ ଲାଗିଥିବା ଏହି ଜିପିଏସ ଟ୍ରାକର୍ ଦ୍ୱାରା କଏଦୀଙ୍କ ଅବସ୍ଥିତି ସମ୍ପର୍କରେ ସବିଶେଷ ତଥ୍ୟ ପାଇପାରିବ ପୋଲିସ୍ । ଆଉ ଏହି ତଥ୍ୟ ଜେଲର କର୍ତ୍ତୃପକ୍ଷଙ୍କ ନିକଟରେ ରହିବ ଏବଂ ପ୍ରତି ମୁହୂର୍ତ୍ତରେ ସେ ଅପଡେଟ ପାଇ ପାରିବେ । ଏହାବ୍ୟତୀତ ଅପରାଧୀ ଯଦି ଜିପିଏସ କାଢିବା ପାଇଁ ଚେଷ୍ଟା ବି କରନ୍ତି, ତେବେ ସ୍ଥାନୀୟ ଥାନାକୁ ଏହାର ଆଲର୍ଟ ଯିବ ଏବଂ କଏଦୀଙ୍କୁ ଧରିବାରେ ପୋଲିସ ସଫଳ ହୋଇପାରିବ ।
