ପିଲାମାନେ ସ୍କୁଲରେ ଅନିଚ୍ଛା ସତ୍ତ୍ୱେ ମଧ୍ୟାହ୍ନଭୋଜନ ଖାଉଥିବା ଦେଖା ଯାଉଛି

ପ୍ରଥମରୁ ପଞ୍ଚମ ଶ୍ରେଣୀ ପିଲାଙ୍କ ପାଇଁ ଶହେ ଗ୍ରାମ ଚାଉଳ ଓ ପନିପରିବା, ଅଣ୍ଡା ବାବଦକୁ ୫.୪୨ ଟଙ୍କା ଏବଂ ୬-୮ ଶ୍ରେଣୀ ଛାତ୍ରଛାତ୍ରୀଙ୍କ ପାଇଁ ୧୫୦ ଗ୍ରାମ ଚାଉଳ ଓ ପନିପରିବା ବାବଦକୁ ୮.୧୦ ଟଙ୍କା ଅନୁଦାନ ଦିଆଯାଇଥାଏ। ସଂପୃକ୍ତ ସ୍କୁଲର ବ୍ୟାଙ୍କ୍‌ ଆକାଉଣ୍ଟ୍‌କୁ ଏହି ଅନୁଦାନ ରାଶି ଆସିବାପରେ ତଦନୁଯାୟୀ କିଣାବିକା କରାଯାଏ। ଏହି କ୍ରମରେ ସୁନ୍ଦରଗଡ଼ ଜିଲ୍ଲାରେ ମଧ୍ୟ ଏମ୍‌ଡିଏମ୍‌ ବଣ୍ଟାଯାଉଛି। ବର୍ତ୍ତମାନ ଜିଲ୍ଲାର ୨୩୨୪ ସ୍କୁଲର ୧ ଲକ୍ଷ ୮୭ ହଜାର ୧୬୧ ଜଣ ଛାତ୍ରଛାତ୍ରୀ ଏହାଦ୍ୱାରା ଉପକୃତ ହେଉଛନ୍ତି। ଉଲ୍ଲେଖଯୋଗ୍ୟ, ଗତ ଦୁଇଟି ଶିକ୍ଷାବର୍ଷ, ଅର୍ଥାତ୍‌ ୨୦୨୦-୨୧ ଓ ୨୦୨୧-୨୨ରେ କରୋନା ମହାମାରୀ ଯୋଗୁଁ ସ୍କୁଲଗୁଡ଼ିକ ବନ୍ଦ ରହିବାରୁ ମଧ୍ୟାହ୍ନଭୋଜନ ମଧ୍ୟ ବନ୍ଦ ରହିଥିଲା। ତେବେ ଏହି ଯୋଜନାରୁ ପିଲାଙ୍କୁ ବଞ୍ଚିତ ନ ରଖିବାକୁ ସରକାର ପଦକ୍ଷେପ ନେଇଥିଲେ। ସେତେବେଳେ ମଧ୍ୟାହ୍ନ ଭୋଜନ ବାବଦକୁ ଆସୁଥିବା ପ୍ରତ୍ୟେକ ପିଲା ପିଛା ଅନୁଦାନକୁ ସିଧାସଳଖ ପିଲାମାନଙ୍କ ଆକାଉଣ୍ଟ୍‌ରେ ଡିପୋଜିଟ୍‌ କରାଯାଇଥିଲା। ଯେଉଁ ପିଲାମାନଙ୍କର ବ୍ୟାଙ୍କ୍‌ ଆକାଉଣ୍ଟ୍‌ ନ ଥିଲା, ସେମାନଙ୍କ ପିତା-ମାତାଙ୍କୁ ନଗଦ ଟଙ୍କା ଦିଆଯାଉଥିଲା। ସୁରୁଖୁରୁରେ ଗତ ଦୁଇ ବର୍ଷ ଏହି ପ୍ରକ୍ରିୟା ଚାଲିଥିବାବେଳେ ଏହି ନିୟମକୁ ଏଥର ଲାଗୁ କରିବାକୁ ଦାବି ହୋଇଛି। ଅତି ସକାଳୁ ମଧ୍ୟାହ୍ନଭୋଜନ ଦିଆଯାଉଥିବାରୁ ପିଲାମାନେ ଏଥିପ୍ରତି ବିମୁଖ ହେବା ସ୍ୱାଭାବିକ। ଏଣୁ ପୂର୍ବଭଳି ପିଲା ଆକାଉଣ୍ଟ୍‌କୁ ଟଙ୍କା ପଠାଗଲେ ଖାଦ୍ୟ ଅପଚୟକୁ ରୋକାଯାଇପାରିବ ଏବଂ ଉକ୍ତ ଅର୍ଥର ସୁବିନିଯୋଗ ହେବ।