ପୂଜା ଏଣ୍ଟରଟେନମେଣ୍ଟ ଦ୍ୱାରା ପ୍ରଯୋଜିତ ଆକ୍ସନ୍ ଥ୍ରିଲର୍ ଫିଲ୍ମକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି । ଯାହାକୁ ନେଇ ସାଧାରଣରେ ଚର୍ଚ୍ଚା ଆରମ୍ଭ ହୋଇଯାଇଛି । ତେବେ ଏହି ଫିଲ୍ମରେ ମେଲ୍ ଲିଡ୍ ଭାବେ ନଜର ଆସିବେ ଟାଇଗର ଶ୍ରଫ୍ ।
ସେହିପରି ଜଗନ ଶକ୍ତି ନିର୍ଦ୍ଦେଶନା ଦାୟିତ୍ୱ ନିର୍ବାହ କରୁଥିବାବେଳେ ପ୍ରଯୋଜନା ଦାୟିତ୍ୱ ସମ୍ଭାଳିବେ ଜ୍ୟାକି ଭାଗନାନି । ଭାରତ ସମେତ ୟୁରୋପରେ ଫିଲ୍ମର ଅଧିକାଂଶ ସୁଟିଂ ହେବ । ଏହାକୁ ବଡ଼ ଧରଣର ମିଶନ୍ ଆଧାରିତ ଫିଲ୍ମ ରୂପେ ପ୍ରସ୍ତୁତ କରିବାକୁ ଫିଲ୍ମମେକର୍ ଯୋଜନା କରିଛନ୍ତି । ଫିଲ୍ମ ପାଇଁ ଜୋରଦାର୍ ପ୍ରସ୍ତୁତି ଚାଲିଛି ।
ଅନ୍ୟପଟେ ଫିଲ୍ମମେକର୍ ଏହି ଆକ୍ସନ୍ ଫିଲ୍ମ ପାଇଁ ମୁଖ୍ୟ ନାୟିକାଙ୍କ ନାମ ଚୟନ କରିସାରିଛନ୍ତି । ରିପୋର୍ଟ ଅନୁସାରେ, ଫିମେଲ୍ ଲିଡ୍ ଭୂମିକାରେ ନଜର ଆସିବେ ସାରା ଅଲି ଖାନ୍ । ସେ ଫିଲ୍ମ ସାଇନ୍ କରିସାରିଛନ୍ତି । ନିର୍ମାତା ଫ୍ରେଶ୍ ଯୋଡ଼ିଙ୍କୁ କାଷ୍ଟ୍ କରିବାକୁ ଚାହୁଁଥିଲେ । ଶେଷରେ ଟାଇଗର-ସାରାଙ୍କ ପାଖରେ ସେମାନଙ୍କ ଖୋଜା ଶେଷ ହୋଇଛି ।
ଏହି ଫିଲ୍ମ ଜରିଆରେ ଦର୍ଶକ ପ୍ରଥମ ଥର ଟାଇଗର-ସାରାଙ୍କ ଯୋଡ଼ିକୁ ବଡ଼ ପରଦାରେ ଦେଖିବାକୁ ପାଇବେ । ଦୁଇ କଳାକାର ପ୍ରଥମ ଥର ଫିଲ୍ମ ଯାତ୍ରା ଆରମ୍ଭ କରିବାକୁ ଯାଉଥିବାରୁ ଖୁବ୍ ଉତ୍ସାହିତ ଅଛନ୍ତି । ଆସନ୍ତା ଡିସେମ୍ବର ୧୦ ତାରିଖ ବେଳକୁ ଫିଲ୍ମଟି ସୁଟିଂ ଫ୍ଲୋର୍କୁ ଓହ୍ଲାଇବ ବୋଲି କୁହାଯାଉଛି ।
