ପୂଜା ପରେ ଖୋଲିବ ସ୍କୁଲ । ଆସନ୍ତା ୨୧ରୁ ଏକାଦଶ ଓ ୨୫ରୁ ଅଷ୍ଟମ ଶ୍ରେଣୀ ପିଲାଙ୍କ କ୍ଲାସ ଆରମ୍ଭ ହେବ । ଏନେଇ ସୂଚନା ଦେଇଛନ୍ତି ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ । ପୂଜା ଛୁଟି ପରେ ଏହି ଦୁଇଟି ଶ୍ରେଣୀ ଖୋଲିବା ଲାଗି ଆନୁସାଙ୍ଗିକ ପ୍ରସ୍ତୁତି କରିବାକୁ ଆସନ୍ତାକାଲି ବିଭାଗ ପକ୍ଷରୁ ଡିଇଓମାନଙ୍କୁ ନେଇ ବୈଠକ ମାଧ୍ୟମରେ ନିର୍ଦ୍ଦେଶ ଦିଆଯିବ ବୋଲି ମନ୍ତ୍ରୀ କହିଛନ୍ତି ।
କରୋନା ଶିକ୍ଷାକ୍ଷେତ୍ର ଉପରେ ଅଧିକ ପ୍ରଭାବ ପକାଇଥିଲା । କିନ୍ତୁ ବର୍ତ୍ତମାନ କରୋନା ସଂକ୍ରମଣ ହ୍ରାସ ପାଉଛି ତାସହ ଟିକାକରଣ ମଧ୍ୟ ତ୍ୱରାନ୍ୱିତ ହୋଇଛି । ଏଥିପାଇଁ ସ୍କୁଲ ଖୋଲିବା ନେଇ ନିଷ୍ପତି ନେଇଛନ୍ତି ସରକାର । ଏଣିକି କ୍ଲାସରୁମରେ ବସି ପାଠପଢ଼ିପାରିବେ ଛାତ୍ରଛାତ୍ରୀ । ପୂର୍ବଭଳି କ୍ଲାସରୁମରେ କଟକଣା ରହିବ । କ୍ଲାସରୁମରେ ଛାତ୍ରଛାତ୍ରୀ ସାମାଜିକ ଦୂରତା ରଖିବା ସହ ମାସ୍କ ଏବଂ ସାନିଟାଇଜର ବ୍ୟବହାର କରିବା ବାଧ୍ୟତାମୂଳକ। ପ୍ରଥମରୁ ସପ୍ତମ ଶ୍ରେଣୀ ପର୍ଯ୍ୟନ୍ତ ଖୋଲିବା ନେଇ ପରବର୍ତ୍ତୀ ସମୟରେ ନିଷ୍ପତି ନିଆଯିବ ।
