ନୂଆଦିଲ୍ଲୀ, 6 ଜାନୁୟାରୀ – ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ଇସ୍ରୋକୁ ପ୍ରଥମ ସୂର୍ଯ୍ୟ ମିଶନର ସଫଳତାପୂର୍ବକ ଅନ୍ତିମ କକ୍ଷରେ ପହଞ୍ଚିବା ପରେ ଶୁଭେଚ୍ଛା ଜଣାଇଛନ୍ତି । ଦେଶର ପ୍ରଥମ ସୂର୍ଯ୍ୟ ମିଶନ ଆଦିତ୍ୟ ଏଲ-1କୁ ଇସ୍ରୋ ଗତବର୍ଷ ସେପ୍ଟେମ୍ବର 2ରେ ଲଞ୍ଚ କରିଥିଲା ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋସିଆଲ ମିଡିଆ ଏକ୍ସରେ ପୋଷ୍ଟ କରି କହିଛନ୍ତି ଯେ, ଭାରତ ଆଉ ଏକ ଉପଲବ୍ଧି ହାସଲ କରିଛି । ଭାରତର ପ୍ରଥମ ସୌର ମିଶନ ଆଦିତ୍ୟ ଏଲ-1 ନିଜର ଗନ୍ତବ୍ୟ ପଥରେ ପହଞ୍ଚିଛି । ଏହା ସବୁଠୁ ଜଟିଳ ମହାକାଶ ଅଭିଯାନକୁ ସାକାର କରିବାରେ ଆମର ବୈଜ୍ଞାନିକଙ୍କ ଅକଥ ସମର୍ପଣର ପ୍ରମାଣ ଅଟେ । ମୁଁ ଏହି ଅସାଧାରଣ ଉପଲବ୍ଧିର ପ୍ରଶଂସା କରିବାରେ ଦେଶ ସହିତ ସାମିଲ ଅଛି । ଆମେ ମାନବତାର ଲାଭ ପାଇଁ ବିଜ୍ଞାନର ନୂଆ ସୀମାକୁ ଆଗକୁ ନେବା ଜାରି ରଖିବୁ ।
