୬୧ତମ ଫେମିନା ମିସ୍ ଇଣ୍ଡିଆ ୨୦୨୬ର ଗ୍ରାଣ୍ଡ ଫିନାଲେ ଆଜି କିଟ୍ କ୍ୟାମ୍ପସରେ ଆୟୋଜିତ ହେବ। ଏହି ଆକର୍ଷଣୀୟ ଓ ଗ୍ଲାମରସ୍ ଅନୁଷ୍ଠାନରେ ଦେଶର ବିଭିନ୍ନ ସ୍ଥାନରୁ ଆସିଥିବା ଶୀର୍ଷ ୩୦ ଜଣ ପ୍ରତିଯୋଗୀ ମୁକୁଟ ପାଇଁ ପ୍ରତିସ୍ପର୍ଧା କରିବେ।
ଅନୁଷ୍ଠାନକୁ ଜନପ୍ରିୟ ସଂଚାଳକ ମନୀଷ ପଲ ଓ ୨୦୦୭ର ଫେମିନା ମିସ୍ ଇଣ୍ଡିଆ ୱର୍ଲ୍ଡ ସାରା ଜେନ୍ ଡାଏସ୍ ସଂଚାଳନ କରିବେ। ଏହା ସହିତ ଅନେକ ପ୍ରସିଦ୍ଧ ଚଳଚ୍ଚିତ୍ର ନାୟିକା, ସଙ୍ଗୀତଜ୍ଞ ଓ କ୍ରୀଡ଼ା ପ୍ରତିଭାମାନେ ମଧ୍ୟ ଉପସ୍ଥିତ ରହିବେ। ବିଶେଷ କରି ଜିନାତ ଆମାନ, ମଧୁର ଭଣ୍ଡାରକର, ନେହା ଧୂପିଆ, ଅମାଲ ମଲ୍ଲିକ, ଦୂତୀ ଚାନ୍ଦ, ଇଶାନ ଖଟ୍ଟର ଓ ଜୁବିନ ନୌଟିଆଲଙ୍କ ଉପସ୍ଥିତି ଅନୁଷ୍ଠାନକୁ ଅଧିକ ଆକର୍ଷଣୀୟ କରିବ।
ଏହି ଅବସରରେ ଅଭିନେତ୍ରୀ ଲରେନ୍ ଗଟଲିବ୍ ବିଶେଷ ପ୍ରଦର୍ଶନ ଦେବେ। ଏହା ଓଡ଼ିଶା ପାଇଁ ଏକ ଐତିହାସିକ ମୁହୂର୍ତ୍ତ, କାରଣ ପ୍ରଥମ ଥର ପାଇଁ ଏକ ବିଶ୍ୱବିଦ୍ୟାଳୟ କ୍ୟାମ୍ପସରେ ଏହି ଗ୍ରାଣ୍ଡ ଫିନାଲେ ଆୟୋଜିତ ହେଉଛି।
ଗତ କିଛି ଦିନ ଧରି ପ୍ରତିଯୋଗୀମାନେ ଓଡ଼ିଶାର ସମୃଦ୍ଧ ଐତିହ୍ୟ ଓ ସଂସ୍କୃତି ସହ ପରିଚିତ ହୋଇ ପୁରୀ ଜଗନ୍ନାଥ ମନ୍ଦିର, କୋଣାର୍କ ସୂର୍ଯ୍ୟ ମନ୍ଦିର ଓ ଚନ୍ଦ୍ରଭାଗା ସମୁଦ୍ରତଟ ପରିଦର୍ଶନ କରିଥିଲେ।
ସୌନ୍ଦର୍ଯ୍ୟ, ପ୍ରତିଭା ଓ ଆତ୍ମବିଶ୍ୱାସର ସମନ୍ୱୟରେ ଆଜିର ଏହି ଗ୍ରାଣ୍ଡ ଫିନାଲେ ଏକ ଅବିସ୍ମରଣୀୟ ସନ୍ଧ୍ୟା ହେବାକୁ ଯାଉଛି।
