ଗୋଦାବରୀଶ ମିଶ୍ର ଆଦର୍ଶ ପ୍ରାଥମିକ ବିଦ୍ୟାଳୟ ପ୍ରକଳ୍ପର ପ୍ରଗତି ସମୀକ୍ଷା କଲେ ମୁଖ୍ୟମନ୍ତ୍ରୀ

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଲୋକ ସେବା ଭବନରେ ପଣ୍ଡିତ ଗୋଦାବରୀଶ ମିଶ୍ର ଆଦର୍ଶ ପ୍ରାଥମିକ ବିଦ୍ୟାଳୟ ପ୍ରକଳ୍ପର ପ୍ରଗତି ସମୀକ୍ଷା କରିଥିଲେ।
ଏହି ଅବସରରେ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ ଯେ ଯେଉଁ ସମସ୍ତ ବିଦ୍ୟାଳୟର ଶୁଭାରମ୍ଭ ହୋଇସାରିଛି, ସେଗୁଡ଼ିକର ନିର୍ମାଣ କାମକୁ ତ୍ୱରାନ୍ବିତ କରାଯାଉ ଏବଂ ପ୍ରତ୍ୟେକ ବିଦ୍ୟାଳୟରେ କ୍ଲାସ୍‌ରୁମ୍ ସଂଖ୍ୟା ବଢ଼ାଯାଉ।
ସଭାରେ ବିଦ୍ୟାଳୟ ପାଇଁ ଜମି ଚିହ୍ନଟ, ଭବନ ଡିଜାଇନ୍ ଓ ବଜେଟ୍ ବିନିଯୋଗ ସମ୍ବନ୍ଧରେ ଆଲୋଚନା ହୋଇଥିଲା। ମୁଖ୍ୟମନ୍ତ୍ରୀ ଭବିଷ୍ୟତ ଆବଶ୍ୟକତାକୁ ମନେ ରଖି ପ୍ରତ୍ୟେକ ବିଦ୍ୟାଳୟରେ କ୍ଲାସ୍‌ରୁମ୍ ସଂଖ୍ୟା ବଢ଼ାଇବା ସହିତ ନିର୍ମାଣ କାମକୁ ଶୀଘ୍ର ସମାପ୍ତ କରିବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। ସେ ଠିକ୍ ଭାବରେ ଖର୍ଚ୍ଚ ଆନୁମାନ କରିବାକୁ ଜୋର ଦେଇଥିବା ସହ ଆବଶ୍ୟକ ହେଲେ ଅତିରିକ୍ତ ଅର୍ଥ ବିନିଯୋଗ କରାଯିବ ବୋଲି ଆଶ୍ୱାସନ ଦେଇଥିଲେ।
ଏହି ସଭାରେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ, ମୁଖ୍ୟ ଶାସନ ସଚିବ ଅନୁ ଗର୍ଗ ଓ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।