ଭୁବନେଶ୍ୱର, ୨୫ ମଇ- ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ ସୋମବାର ବିଜୁ ଜନତା ଦଳ (ବିଜେଡି)ର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି। ନିଜ ଇସ୍ତଫା ପତ୍ରରେ ସେ ଅଭିଯୋଗ କରିଛନ୍ତି ଯେ, ଦଳରେ ତାଙ୍କୁ “ଜାଣିଶୁଣି ଅଣଦେଖା’ କରାଯାଇଥିଲା ଏବଂ ଏଭଳି ଅନୁଭବ କରାଯାଇଥିଲା ଯେ ଦଳକୁ ଆଉ ତାଙ୍କ ସେବାର ଆବଶ୍ୟକତା ନାହିଁ।
ବିଜେଡି ସଭାପତି ନବୀନ ପଟ୍ଟନାୟକଙ୍କୁ ସମ୍ବୋଧିତ କରି ଲେଖିଥିବା ଇସ୍ତଫା ପତ୍ରରେ ସାମନ୍ତରାୟ ତାଙ୍କୁ ରାଜ୍ୟସଭାକୁ ପଠାଇଥିବାରୁ ଏବଂ ଅବିଭକ୍ତ କଟକ ଜିଲ୍ଲାର ଲୋକମାନଙ୍କ ସେବା କରିବା ସହ ଜାତୀୟ ସ୍ତରରେ ଓଡିଶାର ବିଭିନ୍ନ ପ୍ରସଙ୍ଗ ଉଠାଇବାର ସୁଯୋଗ ଦେଇଥିବାରୁ କୃତଜ୍ଞତା ଜଣାଇଛନ୍ତି।
ପତ୍ରରେ ସେ ଲେଖିଛନ୍ତି, “ମୋତେ ରାଜ୍ୟସଭା ପାଇଁ ନାମାଙ୍କିତ କରିଥିବାରୁ ମୁଁ ସର୍ବଦା ଆପଣଙ୍କ ପ୍ରତି ଋଣୀ ରହିବି। ଆପଣ ମୋତେ ଅବିଭକ୍ତ କଟକ ଜିଲ୍ଲାର ଲୋକଙ୍କ ସେବା କରିବା ଏବଂ ଜାତୀୟ ମଞ୍ଚରେ ଓଡିଶାର ସମସ୍ୟା ଉଠାଇବାର ଯେ ସୁଯୋଗ ଦେଇଥିଲେ, ସେଥିପାଇଁ ମୁଁ ଆପଣଙ୍କ ପ୍ରତି ହୃଦୟରୁ ଗଭୀର କୃତଜ୍ଞତା ଜଣାଉଛି।”
ସାମନ୍ତରାୟ କହିଛନ୍ତି ଯେ, ସେ ସବୁବେଳେ ଦଳର ହିତକୁ ସର୍ବୋପରି ରଖିଥିଲେ ଏବଂ ବର୍ଷକାଳ ଧରି ପୂର୍ଣ୍ଣ ନିଷ୍ଠା ଓ ପ୍ରତିବଦ୍ଧତା ସହିତ ସଂଗଠନ ପାଇଁ କାମ କରିଥିଲେ। କିନ୍ତୁ ସମ୍ପ୍ରତି ସମୟରେ ଦଳ ମଧ୍ୟରେ ତାଙ୍କୁ ଲଗାତାର ଅଣଦେଖା ଏବଂ ଅପମାନିତ କରାଯାଉଥିବା ଅନୁଭବ ହୋଇଥିଲା।
ସେ ନିଜ ପତ୍ରରେ ଲେଖିଛନ୍ତି, “ମୁଁ ସର୍ବଦା ଦଳର ହିତରେ କାର୍ଯ୍ୟ କରିଛି ଏବଂ ପୂର୍ଣ୍ଣ ବିଶ୍ୱାସ ଓ ସମର୍ପଣ ସହିତ ସଂଗଠନର ସେବା କରିଛି। କିନ୍ତୁ ସମ୍ପ୍ରତି ମୋତେ ଏଭଳି ଅନୁଭବ ହେଉଛି ଯେ, ଦଳ ମଧ୍ୟରେ ମୋତେ ଜାଣଶୁଣି ଅଣଦେଖା ଏବଂ ଅପମାନ କରାଯାଇଛି ଏବଂ ଦଳକୁ ଆଉ ମୋର ସେବାର ଆବଶ୍ୟକତା ନାହିଁ। ସେହିପରି ଜନହିତକୁ ଦୃଷ୍ଟିରେ ରଖି ମୁଁ ଏହି କଠିନ ସିଦ୍ଧାନ୍ତ ନେଇଛି ଏବଂ ମୋର ଇସ୍ତଫା ଗ୍ରହଣ କରିବାକୁ ଅନୁରୋଧ କରୁଛି।”
