ରାଜଗାଙ୍ଗପୁର: ସୁନ୍ଦରଗଡ଼ ଜିଲ୍ଲାର ରାଜଗାଙ୍ଗପୁର ଅଞ୍ଚଳରେ ଆଜି ସକାଳେ ଏକ ଭୟାବହ ଅଗ୍ନିକାଣ୍ଡ ଘଟି ବଡ଼ ଧରଣର କ୍ଷତି ହୋଇଛି। ପଡ଼ାଜାମ୍ପାଲି ଅଞ୍ଚଳରେ ଥିବା ଏକ ଘରୋଇ ଟାୟାର କାରଖାନାରେ ଲାଗିଥିବା ଏହି ନିଆଁ ଦେଖୁଦେଖୁ ଭୟଙ୍କର ରୂପ ଧାରଣ କରି ସମଗ୍ର କାରଖାନାକୁ ଆଚ୍ଛାଦିତ କରିଦେଇଥିଲା।
ପ୍ରାଥମିକ ସୂଚନା ଅନୁଯାୟୀ, ରବିବାର ସକାଳେ ହଠାତ୍ କାରଖାନାରୁ ଘନ କଳା ଧୂଆଁ ବାହାରୁଥିବା ସ୍ଥାନୀୟ ଲୋକେ ଦେଖିଥିଲେ। କିଛି ସମୟ ମଧ୍ୟରେ ନିଆଁ ବେଗରେ ବ୍ୟାପି ଯାଇଥିଲା। କାରଖାନା ଭିତରେ ଟାୟାର, ରବର ଓ ବିଭିନ୍ନ ରସାୟନିକ ପଦାର୍ଥ ବହୁ ପରିମାଣରେ ରହିଥିବାରୁ ନିଆଁ ତୀବ୍ର ହୋଇଯାଇଥିଲା ଓ ଆକାଶକୁ ଉଚ୍ଚ କଳା ଧୂଆଁର ଗୁଚ୍ଛ ଉଠୁଥିବା ଦୃଶ୍ୟ ଦେଖି ସ୍ଥାନୀୟ ଅଞ୍ଚଳରେ ଆତଙ୍କ ସୃଷ୍ଟି ହୋଇଥିଲା।
ଖବର ପାଇ ସ୍ଥାନୀୟ ଅଗ୍ନିଶମ ବିଭାଗର ଏକାଧିକ ଦମକଳ ଗାଡ଼ି ତୁରନ୍ତ ଘଟଣାସ୍ଥଳକୁ ପହଞ୍ଚି ନିଆଁ ନିବାନ୍ତା ପାଇଁ ଯୁଦ୍ଧକାଳୀନ ଭିତ୍ତିରେ କାମ କରୁଛନ୍ତି। ନିଆଁ ଯେପରି ଆଖପାଖ ଘରବାଡ଼ିକୁ ନବ୍ୟାପେ, ସେଥିପାଇଁ ବିଶେଷ ସାବଧାନତା ଅବଲମ୍ବନ କରାଯାଇଛି।
ଅଗ୍ନିକାଣ୍ଡର ପ୍ରକୃତ କାରଣ ଏପର୍ଯ୍ୟନ୍ତ ଜଣାପଡ଼ିନଥିବା ବେଳେ ସର୍ଟ ସର୍କିଟ୍ କିମ୍ବା ଯନ୍ତ୍ରପାତିର ତ୍ରୁଟି ହୋଇଥାଇପାରେ ବୋଲି ପ୍ରାଥମିକ ଅନୁମାନ କରାଯାଉଛି।
ସୁଭାଗ୍ୟବଶତଃ ଏହି ଘଟଣାରେ କୌଣସି ମୃତାହତର ଖବର ମିଳିନାହିଁ, କିନ୍ତୁ କାରଖାନାରେ ଥିବା ଲକ୍ଷାଧିକ ଟଙ୍କାର କଞ୍ଚାମାଲ ଓ ଯନ୍ତ୍ରପାତି ପୋଡ଼ି ନଷ୍ଟ ହୋଇଥିବା ଆଶଙ୍କା ରହିଛି। ପୋଲିସ ଓ ପ୍ରଶାସନ ଘଟଣାସ୍ଥଳରେ ଉପସ୍ଥିତ ରହି ସ୍ଥିତିକୁ ନିୟନ୍ତ୍ରଣରେ ରଖିଛନ୍ତି।
ନିଆଁ ସମ୍ପୂର୍ଣ୍ଣ ନିୟନ୍ତ୍ରଣରେ ଆସିବା ପରେ କ୍ଷୟକ୍ଷତିର ସଠିକ୍ ଆକଳନ କରାଯିବ ବୋଲି ପ୍ରଶାସନ ପକ୍ଷରୁ ସୂଚନା ମିଳିଛି।
