ଦିନକୁ ଦିନ ଇସ୍ରାଏଲ ଏବଂ ହମାସ ମଧ୍ୟରେ ଯୁଦ୍ଧ ବଢିବାରେ ଲାଗିଛି। ଆଉ ଏହି ଯୁଦ୍ଧ ଯୋଗୁଁ ସେଠାରେ ଉପସ୍ଥିତ ଥିବା ଭାରତୀୟଙ୍କ ପାଇଁ ଦେଶ ଚିନ୍ତିତ। ଇସ୍ରାଏଲରୁ ଭାରତୀୟ ନାଗରିକଙ୍କ ନିରାପଦ ପ୍ରତ୍ୟାବର୍ତ୍ତନ ପାଇଁ ଭାରତ ‘ଅପରେସନ ଅଜୟ’ ଆରମ୍ଭ କରିଛି। ଏହି ନିରାପତ୍ତା ଅପରେସନ ଅଧୀନରେ ଇସ୍ରାଏଲର ଭାରତୀୟମାନଙ୍କର ଦ୍ୱିତୀୟ ବିମାନ ଦିଲ୍ଲୀରେ ପହଞ୍ଚିଛି। ୨୩୫ ଭାରତୀୟ ନାଗରିକଙ୍କୁ ନେଇ ଏକ ସ୍ବତନ୍ତ୍ର ବିମାନ ଦିଲ୍ଲୀରେ ପହଞ୍ଚିଛି। ଏମାନଙ୍କୁ ସ୍ବାଗତ କରିବା ପାଇଁ ବିମାନବନ୍ଦରରେ ବୈଦେଶିକ ବ୍ୟାପାର ରାଜ୍ୟ ମନ୍ତ୍ରୀ ରାଜକୁମାର ରଂଜନ ସିଂ ଉପସ୍ଥିତ ଥିଲେ। ଦ୍ୱିତୀୟ ବିମାନରେ ଫେରିଥିବା ଭାରତୀୟଙ୍କ ମଧ୍ୟରେ ୨ ଶିଶୁ ରହିଛନ୍ତି। ଶୁକ୍ରବାର ସେମାନଙ୍କୁ ସୁରକ୍ଷିତ ଭାବେ ବାହାରକୁ ନିଆଯାଇଥିଲା। ସ୍ଥାନୀୟ ସମୟ ଅନୁଯାୟୀ, ବିମାନଟି ରାତି ୧୧ଟା ସମୟରେ ଇସ୍ରାଏଲରୁ ଉଡ଼ିଥିଲା। ସୂଚନାଯୋଗ୍ୟ, ଏହାର ଗୋଟିଏ ଦିନ ପୂର୍ବରୁ ୨୧୨ ଭାରତୀୟଙ୍କୁ ଏକ ସ୍ବତନ୍ତ୍ର ବିମାନ ମାଧ୍ୟମରେ ଭାରତ ଅଣାଯାଇଥିଲା। ଭାରତ ଗୁରୁବାର ଅପରେସନ ଅଜୟ ଘୋଷଣା କରିଛି। ଏହାର ଉଦ୍ଦେଶ୍ୟ ହେଉଛି ଇସ୍ରାଏଲରେ ବାସ କରୁଥିବା ଭାରତୀୟମାନଙ୍କର ନିରାପଦ ପ୍ରତ୍ୟାବର୍ତ୍ତନ। ଏହି ଅପରେସନ ମାଧ୍ୟମରେ କେବଳ ସେହି ଲୋକମାନଙ୍କୁ ଇସ୍ରାଏଲରୁ ଅଣାଯାଉଛି, ଯେଉଁମାନେ ସେଠାରୁ ଆସିବାକୁ ଇଚ୍ଛୁକ।
