ଆସନ୍ତା ୨୫ ତାରିଖରେ ରାଜସ୍ଥାନ ବିଧାନସଭା ନିର୍ବାଚନ ପାଇଁ ମତଦାନ ଅନୁଷ୍ଠିତ ହେବାକୁ ଯାଉଛି | ଏହାକୁ ନେଇ ଏବେ ବିଭିନ୍ନ ଦଳର ପ୍ରଚାର ଅଭିଯାନ ଜୋରସୋରରେ ଆରମ୍ଭ ହୋଇଯାଇଛି | ଏହି ସମୟରେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଆଜି ରାଜସ୍ଥାନ କୋଟାରେ କଂଗ୍ରେସ ସରକାର ଉପରେ ଜୋରଦାର ବର୍ଷିଛନ୍ତି | ଶିବରାଜ କହିଛନ୍ତି ଯେ କଂଗ୍ରେସ ନେତା ରାହୁଲ ଗାନ୍ଧୀ ଦେଶର ଲଜ୍ଜା ହୋଇଥିବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶର ଗର୍ବ। ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ଚୌହାନ ଆଜି ଏକ ଜନସଭାକୁ ସମ୍ବୋଧିତ କରି କହିଛନ୍ତି ଯେ ବର୍ତ୍ତମାନର କଂଗ୍ରେସ ସରକାର ସମୟରେ ଦଳିତଙ୍କ ଉପରେ ହୋଇଥିବା ଅତ୍ୟାଚାର, ଦୁର୍ନୀତିରେ ରାଜସ୍ଥାନ ଦେଶର ଏକ ନମ୍ବର ସ୍ଥାନରେ ରହିଛି | କେବଳ ଏତିକି ନୁହେଁ ସେ ଆହୁରୀ ମଧ୍ୟ କହିଛନ୍ତି ଯେ ରାଜସ୍ଥାନରେ ପ୍ରତିଦିନ ୧୭ ଜଣ ଭଉଣୀ-ଝିଅଙ୍କୁ ଦୁଷ୍କର୍ମ କରାଯାଉଛି, ଏଠାରେ ଅପରାଧୀଙ୍କ ଉପରେ କୌଣସି ନିୟନ୍ତ୍ରଣ ନାହିଁ। ସାରା ଦେଶରେ ରାହୁଲ ଏବଂ ପ୍ରିୟଙ୍କା, ଭାଇ ଓ ଭଉଣୀ ପାଣି ପିଇ ପିଇ ଦେଶର ପ୍ରଧାନମନ୍ତ୍ରୀଙ୍କୁ ଗାଳି କରିବା ସହ ମିଥ୍ୟା ଘୋଷଣା କରୁଛନ୍ତି। ସେ ଅଭିଯୋଗ କରିଛନ୍ତି ଯେ ଗତ ବିଧାନସଭା ନିର୍ବାଚନରେ କୃଷକ ଋଣ ଛାଡ ପ୍ରତିଶ୍ରୁତି ଦେଇ ରାଜସ୍ଥାନରେ କଂଗ୍ରେସ ଦଳ କ୍ଷମତାକୁ ଆସିଥିଲା, କିନ୍ତୁ କାର୍ଯ୍ୟକାଳର ୫ ବର୍ଷ ମଧ୍ୟରେ ମଧ୍ୟ କୃଷକଙ୍କ ଋଣ ଛାଡ କରାଯାଇ ନାହିଁ। ସେ କହିଛନ୍ତି ଯେ ଆମେ ମଧ୍ୟପ୍ରଦେଶରେ ଲଗାତାର ଚାରିଥର କ୍ଷମତାକୁ ଆସିଥିଲୁ। ଏହାର ଫଳାଫଳ ହେଉଛି ଯେ ଆମେ ଜନସାଧାରଣଙ୍କୁ ଦେଇଥିବା ପ୍ରତିଶ୍ରୁତି ଠିକ୍ ସମୟରେ ପୂରଣ କରିଛୁ । ଏଥି ସହ ସେ କହିଛନ୍ତି ଯେ, “ଏଥର ବିଜେପି ସରକାର ଗଠନ କରିବ। ମଧ୍ୟପ୍ରଦେଶରେ ପଞ୍ଚମ ଥର ସରକାର ଗଠନ ହେବାକୁ ଯାଉଛି।
