ଅନେକ ଲୋକ ତମ୍ବା ହାଣ୍ଡି କିମ୍ବା ଗ୍ଲାସରେ ପାଣି ପିଇଥାନ୍ତି। ବିଶେଷ କରି ଆମ ପୂର୍ବପୁରୁଷମାନେ ତମ୍ବା ପାତ୍ରରେ ପାଣି ରଖିବାକୁ ପରାମର୍ଶ ମଧ୍ୟ ଦେଇଥାନ୍ତି । ଭାରତୀୟ ପରମ୍ପରା ଅନୁସାରେ ତମ୍ବା ବାସନଗୁଡିକ ଅତ୍ୟନ୍ତ ମୂଲ୍ୟବାନ। ଆଗ କାଳର ଲୋକମାନେ ବର୍ଷ ବର୍ଷ ଧରି ତମ୍ବା ପାତ୍ରରେ ପାଣି ପିଉଥିଲେ । ମାତ୍ର ସମୟ ବଦଳିବା ସହିତ ଏହା ଧିରେ ଧିରେ ହ୍ରାସ ପାଇଥିବା ଦେଖିବାକୁ ମିଳିଥିଲା। ବର୍ତ୍ତମାନ ସମୟରେ ଅଧିକାଂଶ ଲୋକ ଇସ୍ପାତ, ପ୍ଲାଷ୍ଟିକ ଏବଂ କାଚ ଗ୍ଲାସରେ ପାଣି ପିଉଥିବା ଦେଖିବାକୁ ମିଳୁଛି। ଆପଣ ମାନେ ନିଶ୍ଚୟ ଶୁଣିଥିବେ ଯେ ଏକ ତମ୍ବା ବାସନରେ ପାଣି ପିଇବା ଦ୍ୱାରା ଏହା ସ୍ୱାସ୍ଥ୍ୟ ଉପରେ ଖୁବ୍ ଭଲ ପ୍ରଭାବ ପକାଇଥାଏ। ତେବେ ଆସନ୍ତୁ ଜାଣିବା ଏହାର ସତ୍ୟତା କେତେ…
ତମ୍ବା ପାତ୍ରରେ ପାଣି ପିଇବା ଦ୍ୱାରା କ’ଣ ହୋଇଥାଏ?
ବିଶେଷଜ୍ଞ ଅନୁସାରେ ତମ୍ବା ପାତ୍ରରେ ଜଳ ରଖି ବ୍ୟବହାର କରିବା ଦ୍ୱାରା ଏହା ସ୍ୱାସ୍ଥ୍ୟ ପାଇଁ ଖୁବ୍ ଲାଭଦାୟକ ହୋଇଥାଏ। ତମ୍ବା ହେଉଛି ଏକ ଗୁରୁତ୍ୱପୂର୍ଣ୍ଣ ପୋଷକ ତତ୍ତ୍ୱ ଯାହା ଆମ ଶରୀରର ବିଭିନ୍ନ ପ୍ରକାରର ସମସ୍ୟା ଦୂର କରିବାରେ ସାହାଯ୍ୟ କରିଥାଏ। ଏହି ଧାତୁ ହୃଦୟ ଏବଂ ମସ୍ତିଷ୍କର ସ୍ୱାସ୍ଥ୍ୟକୁ ଭଲ ରଖିବାରେ ସାହାଯ୍ୟ କରିଥାଏ। ତମ୍ବା ବାସନରେ ଆଣ୍ଟି-ବ୍ୟାକ୍ଟେରିଆଲ୍ ଉପାଦାନ ରହିଥାଏ। ଫଳରେ ଏହି ଧାତୁ ପାତ୍ରରେ ୪୮ ଘଣ୍ଟାରୁ ଅଧିକ ସମୟ ଧରି ପାଣି ଗଚ୍ଛିତ କରି ରଖି ପିଇବା ଦ୍ୱାରା, ଏହା ଶରୀରକୁ କ୍ଷତି ପହଞ୍ଚାଉଥିବା ଜୀବାଣୁମାନଙ୍କୁ ନଷ୍ଟ କରିଥାଏ। ତେବେ ତମ୍ବା ପାତ୍ରରେ ରଖାଯାଇଥିବା ପାନୀୟ ଜଳ ଆମର ହଜମ ପ୍ରକ୍ରିୟାରେ ଉନ୍ନତି ଆଣେ, ଏହା ବ୍ୟତୀତ ଏଥିରେ ଥିବା ଆଣ୍ଟି-ଇନ୍ଫ୍ଲାମେଟୋରୀ ଗୁଣ ଆମର ରୋଗ ପ୍ରତିରୋଧକ ଶକ୍ତି ବଢ଼ାଇବାରେ ମଧ୍ୟ ସାହାଯ୍ୟ କରିଥାଏ। ଆପଣ ନିଶ୍ଚିତ ଭାବରେ ଅନେକ ଥର ଶୁଣିଥିବେ ଯେ କ୍ଷାରୀୟ ଜଳ ସ୍ୱାସ୍ଥ୍ୟ ପାଇଁ ଉତ୍ତମ, ଯଦି ଆପଣ ଏକ ତମ୍ବା ଗ୍ଲାସରେ ପାଣି ପିଅନ୍ତି ତେବେ ଏହା ଶରୀରକୁ ଥଣ୍ଡା ରଖିବାରେ ସାହାଯ୍ୟ ମଧ୍ୟ କରିଥାଏ। ତମ୍ବା ପାତ୍ରରେ ପାଣି ରଖି ପିଇବା ଦ୍ୱାରା ଶରୀରରୁ ଉତ୍ତାପ ନିର୍ଗତ ହୁଏ, ତମ୍ବାର କ୍ଷାରୀୟ ଜଳ ଶରୀରର ଅମ୍ଳକୁ ସନ୍ତୁଳିତ କରିଥାଏ।
ଆପଣ ନିଜ ଆବଶ୍ୟକତା ଅନୁଯାୟୀ ଯେକୌଣସି ସମୟରେ ଏକ ତମ୍ବା ପାତ୍ରରୁ ପାଣି ପିଇପାରିବେ। କିନ୍ତୁ ଯଦି ଆପଣ ସକାଳେ ଖାଲି ପେଟରେ ତମ୍ବା ପାତ୍ରରୁ ପାଣି ପିଅନ୍ତି ତେବେ ଆପଣଙ୍କ ଶରୀରକୁ ସର୍ବାଧିକ ଲାଭ ମିଳିଥାଏ। ତଥାପି, ମନେରଖନ୍ତୁ ଯେ ତମ୍ବା ହେଉଛି ଏକ ଟ୍ରେସ୍ ମିନେରାଲ୍ ଯାହା ଶରୀର ଦ୍ୱାରା ବହୁତ କମ୍ ପରିମାଣରେ ଆବଶ୍ୟକ। ଯଦି ଆପଣ ଏହି ଜଳକୁ ଅତ୍ୟଧିକ ପିଅନ୍ତି, ତେବେ ଶରୀରରେ ତମ୍ବା ବିଷାକ୍ତତା ବୃଦ୍ଧି କରିଇପାରେ। ଯାହା ଦ୍ୱାରା ପେଟରେ ଯନ୍ତ୍ରଣା, ଝାଡ଼ା କିମ୍ବା ବାନ୍ତି ହୋଇପାରେ।
