ମଥୁରା: ବୃନ୍ଦାବନରେ ଶୁକ୍ରବାର ଏକ ଭୟାବହ ଦୁର୍ଘଟଣା ଘଟିଛି। ଶ୍ରୀନଗର ଘାଟ ନିକଟରେ ଯମୁନା ନଦୀରେ ଏକ ଡଙ୍ଗା ବୁଡ଼ିଯିବାରୁ ଅନେକ ଭକ୍ତ ଜଳରେ ଫସିଯାଇଥିଲେ।
ସୂଚନା ଅନୁସାରେ, ଡଙ୍ଗାରେ ପ୍ରାୟ ୩୩ ଜଣ ଭକ୍ତ ଥିଲେ, ସେମାନେ ଲୁଧିଆନାରୁ ବାଙ୍କେ ବିହାରୀ ଦର୍ଶନ ପାଇଁ ଆସିଥିଲେ।
ଦୁର୍ଘଟଣା ପରେ ଉଦ୍ଧାରକାରୀ ଦଳ ଯମୁନା ନଦୀରୁ ୨୫ ଜଣଙ୍କୁ ବାହାର କରିଛନ୍ତି। ସେମାନଙ୍କ ମଧ୍ୟରୁ ୧୫ ଜଣ ସୁରକ୍ଷିତ ଅଛନ୍ତି, କିନ୍ତୁ ୧୦ ଜଣଙ୍କ ମୃତ୍ୟୁ ଘଟିଛି। ଆଉ ୮ ଜଣ ଭକ୍ତ ଏପର୍ଯ୍ୟନ୍ତ ନିଖୋଜ ଅଛନ୍ତି, ଯାହାଙ୍କ ସନ୍ଧାନ ଚାଲିଛି।
ଗୁରୁତର ଅବସ୍ଥାରେ ଥିବା କେତେକ ଉଦ୍ଧାର ପାଇଥିବା ବ୍ୟକ୍ତିଙ୍କୁ ଆମ୍ବୁଲାନ୍ସ ଯୋଗେ ନିକଟସ୍ଥ ହସ୍ପିଟାଲକୁ ପଠାଯାଇଛି, ଯେଉଁଠାରେ ସେମାନଙ୍କ ଚିକିତ୍ସା ଚାଲିଛି।
ଘଟଣା ପରେ ଅଞ୍ଚଳରେ ଭିଡ଼ ବଢ଼ିଥିବାରୁ ପୁଲିସ ଫୋର୍ସ ମୁତୟନ କରାଯାଇଛି। ଡାଇଭିଂ ଟିମ୍ ଓ ରେସ୍କ୍ୟୁ ଦଳ ଯମୁନାରେ ତଲାସି ଜାରି ରଖିଛନ୍ତି। ବରିଷ୍ଠ ପୋଲିସ ଓ ପ୍ରଶାସନିକ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଅବସ୍ଥାର ନିରୀକ୍ଷଣ କରୁଛନ୍ତି।
ଏହି ଦୁର୍ଘଟଣା ସମ୍ପର୍କରେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଅବଗତ ହୋଇଛନ୍ତି। ସେ ମୃତକଙ୍କ ପରିବାର ପ୍ରତି ଶୋକ ପ୍ରକାଶ କରିଥିବା ସହ ଉଦ୍ଧାର ଓ ରିଲିଫ କାର୍ଯ୍ୟକୁ ତ୍ୱରାନ୍ୱିତ କରିବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
ଘଟଣାଟି ସମଗ୍ର ଅଞ୍ଚଳରେ ଶୋକ ଓ ଆତଙ୍କର ପରିସ୍ଥିତି ସୃଷ୍ଟି କରିଛି।
