ସୁନ୍ଦରଗଡ : ପରୀକ୍ଷା ବେଳେ ଟଳିପଡିଲେ ପରୀକ୍ଷାର୍ଥୀ। ଏଭଳି ଏକ ଅଭାବନୀୟ ଘଟଣା ମଙ୍ଗଳବାର ସୁନ୍ଦରଗଡରେ ଘଟିଛି । ଓଏସଏସସିର ଶାରୀରିକ ପରୀକ୍ଷା ବେଳେ ଏହି ଅଘଟଣ ଘଟିଥିବା ମଙ୍ଗଳବାର ଖବର ମିଳିଛି । ଦୌଡୁ ଥିବା ବେଳେ ପରୀକ୍ଷାର୍ଥୀଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ଫରେଷ୍ଟଗାର୍ଡ, ଫରେଷ୍ଟର ଏବଂ ପ୍ରାଣୀଧନ ନିରୀକ୍ଷକ ପଦବୀ ପାଇଁ ଏହି ଶାରୀରିକ ପରୀକ୍ଷା କରାଯାଉଥିଲା । ମୃତକ ହେଉଛନ୍ତି ରାଉରକେଲାର ବ୍ୟାଚ୍ ନମ୍ବର ଏ୦୨ ପ୍ରବୀଣ କୁମାର ପଣ୍ଡା । ସେ ଫରେଷ୍ଟ ଗାର୍ଡ ଏବଂ ଫରେଷ୍ଟର ପଦବୀ ପାଇଁ ଆବେଦନ କରି ପରୀକ୍ଷା ଦେଉଥିଲେ । ଭବାନୀପୁରରୁ ବରଗଡ ୨୫ କିଲୋମିଟର ଦୌଡରେ ଭାଗ ନେଇଥିବା ବେଳେ ସଦର ଥାନା କିରେଇ ନିକଟରେ ଚେତାଶୂନ୍ୟ ହୋଇପଡିଥିଲେ । ତାଙ୍କୁ ତୁରନ୍ତ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଥିଲା । ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
