କାଠମାଣ୍ଡୁ: ନେପାଳର ରାଜଧାନୀ କାଠମାଣ୍ଡୁରେ ଅଭାବନୀୟ ଘଟଣା । ଶୁକ୍ରବାର ବିଳମ୍ବିତ ରାତିରେ ଏୟାରପୋର୍ଟ ନିକଟ ତିନକୁନେ ଛକରେ ଥିବା ଏକ କାଠ ମିଲରେ ଗୋଟିଏ ପରିବାର ସଦସ୍ୟଙ୍କୁ ଅତି ନିର୍ମମ ଭାବେ ହତ୍ୟା କରାଯାଇଛି । ହତ୍ୟାକାଣ୍ଡ ପରେ ଅଭିଯୁକ୍ତ ଜଣକ ଥାନାରେ ଆତ୍ମସମର୍ପଣ କରିଛି ।
କାଠମାଣ୍ଡୁ ଏସଏସପି ଦିନେଶ ରାଜ ମୌନାଲୀ ଘଟଣାସ୍ଥଳରେ ପହଞ୍ଚି ତଦନ୍ତ କରିଛନ୍ତି । ଏକ ଧାରୁଆ ଅସ୍ତ୍ରରେ ପରିବାର ସଦସ୍ୟଙ୍କୁ ହତ୍ୟା କରାଯାଇଥିବା ପୋଲିସ ପକ୍ଷରୁ ସୂଚନା ଦିଆଯାଇଛି ।
ମୃତକ ମଧ୍ୟରେ ମିଲ୍ର ସିକ୍ୟୁରିଟି ଗାର୍ଡ କୁମାର ଭୁଜେଲ, ତାଙ୍କ ପତ୍ନୀ ଅମ୍ବିକା ଭୁଜେଲ, କୁମାରଙ୍କ ମାଆ ଏବଂ ସମ୍ପର୍କୀୟ ଅଛନ୍ତି ।
ମିଲ୍ ମ୍ୟାନେଜର ବାଲକୃଷ୍ଣ ଶିଭାକୋଟି କହିଛନ୍ତି ଯେ, କୁମାର ଓ ତାଙ୍କ ପରିବାର ଗତ କିଛି ବର୍ଷ ହେବ ଏଠାରେ ରହୁଥିଲେ । ତାଙ୍କ ମାଆ ଗାଁରେ ରହୁଥିବା ବେଳେ ହତ୍ୟାକାଣ୍ଡର ଦିନକ ପୂର୍ବରୁ ତାଙ୍କ ସ୍ୱାମୀଙ୍କ ଶ୍ରାଦ୍ଧ କର୍ମ ପାଇଁ ଆସିଥିଲେ । ତେବେ ତାଙ୍କୁ ଦୁର୍ବୃତ୍ତ ଜଣକ ଧାରୁଆ ଅସ୍ତ୍ରରେ ହତ୍ୟା କରିଛନ୍ତି ।
