ବାରିପଦା : ପୁଣି ଚର୍ଚ୍ଚାରେ ରାଇରଙ୍ଗପୁର। ଏଥର ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ୍ଙ୍କ ପତ୍ନୀ କଳ୍ପନାଙ୍କୁ ନେଇ ଜୋର ଚର୍ଚ୍ଚା ହେଉଛି। ହେମନ୍ତ ସୋରେନଙ୍କ ବିଧାୟକ ପଦ ରଦ୍ଦ ଆଶଙ୍କା ଭିତରେ କଳ୍ପନା ମୁଖ୍ୟମନ୍ତ୍ରୀ ହେବା ନେଇ ଆଲୋଚନା ହେଉଛି। କଳ୍ପନା ସୋରେନ୍ ମୁଖ୍ୟମନ୍ତ୍ରୀ ହେଲେ, ଓଡ଼ିଶା ପାଇଁ ଗୌରବର ବିଷୟ। କାରଣ ସେ ଝାଡ଼ଖଣ୍ଡର ବୋହୂ ହେଲେ ମଧ୍ୟ ଓଡ଼ିଶାର ଝିଅ। ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ସବ୍ଡିଭିଜନ ବହଳଦା ବ୍ଲକ୍ର ତେନ୍ତଳା ଗାଁର ଝିଅ ହେଉଛନ୍ତି କଳ୍ପନା ସୋରେନ୍। ତାଙ୍କ ବାପା ଆନପ୍ପା ମାଝୀ ଜଣେ ଭଲ ଫୁଟବଲ ଖେଳାଳି। ଏଥିସହ ସେ ଭାରତୀୟ ସେନାରେ ଚାକିରି କରୁଥିଲେ। ଆନପ୍ପା ପଞ୍ଜାବରେ ଚାକିରି କରୁଥିବା ବେଳେ କପୁରଥାଲାରେ କଳ୍ପନା ଜନ୍ମ ଗ୍ରହଣ କରିଥିଲେ। କଳ୍ପନା ବାପା-ମାଆଙ୍କ ବଡ଼ ଝିଅ ହୋଇଥିବା ବେଳେ ବାପାଙ୍କ ଚାକିରି ସମୟରେ କୋଲକାତା, ଅମ୍ବାଲା, ଆହ୍ଲାବାଦ, ଶ୍ରୀନଗର ଆଦି ବିଭିନ୍ନ ସହରରେ ପାଠ ପଢ଼ିଥିଲେ କଳ୍ପନା। ଏଥିସହ ସେ ବାରିପଦା କେନ୍ଦ୍ରୀୟ ବିଦ୍ୟାଳୟରେ ଦଶମ ଶ୍ରେଣୀ ପଢିଥିବା ବେଳେ ବାରିପଦାର ଏମ୍ପିସି ଜୁନିୟର କଲେଜରେ ଯୁକ୍ତ ଦୁଇ ପାଠ ପଢ଼ିଥିଲେ। କଳ୍ପନା ଏହା ପରେ ଭୁବନେଶ୍ୱର ଚାଲି ଯାଇଥିଲେ। ସେଠାରେ ଏକ ଘରୋଇ ଇଞ୍ଜିନିୟରିଂ କଲେଜରେ ସେ ବି-ଟେକ କରିଥିଲେ। ପରେ କୋଳକାତାରେ ଏମ୍ବିଏ କରିଥିଲେ। ପାଠପଢ଼ା ସରିବା ପରେ କଳ୍ପନା ବାରିପଦାରେ ରହୁଥିବା ବାପା-ମାଆଙ୍କ ପାଖକୁ ଚାଲି ଆସିଥିଲେ। ୨୦୦୬ ଫେବୃଆରୀ ୭ ତାରିଖରେ ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଶିବୁ ସୋରେନ୍ଙ୍କ ପୁଅ ହେମନ୍ତ ସୋରେନଙ୍କ ସହିତ କଳ୍ପନାଙ୍କ ବିବାହ ହୋଇଥିଲା। ବାରିପଦାରେ ତାଙ୍କର ବିବାହ ହୋଇଥିଲା। ବିବାହ ପରେ ହେମନ୍ତଙ୍କ ସହିତ କଳ୍ପନା ଶାଶୁଘର ଝାଡ଼ଖଣ୍ଡକୁ ଚାଲି ଯାଇଥିଲେ। ଘର ସଂସାର ଭିତରେ ନିଜକୁ ସୀମିତ ରଖୁଥିବା କଳ୍ପନା ରାଜନୀତିଠାରୁ ଦୂରେଇ ରହୁଥିଲେ। କିନ୍ତୁ ନିର୍ବାଚନ ପ୍ରଚାର ବେଳେ ସେ ସ୍ୱାମୀଙ୍କୁ ସହଯୋଗ କରୁଥିଲେ।
