କୋଭିଡର ପ୍ରକୋପ କିଛି ମାତ୍ରାରେ କମିଥିଲେ ବି ଏଯାଏଁ ବି ଭୟ ଯାଇନାହିଁ। ଏକ ରିପୋର୍ଟରୁ ଜଣାଯାଇଛି ଯେ ବିଶ୍ବରେ ଯେତିକି କୋଭିଡ ଜନିତ ମୃତ୍ୟୁ ରେକର୍ଡଭୁକ୍ତ ହୋଇଛି ତାଠାରୁ ବାସ୍ତବ ମୃତ୍ୟୁ ସଂଖ୍ୟା ବହୁ ଅଧିକ। କୋଭିଡ ଯୋଗୁଁ ବିଶ୍ବରେ ମୋଟ ୧ କୋଟି ୮୨ ଲକ୍ଷ ଲୋକଙ୍କର ମୃତ୍ୟୁ ହୋଇଥିବା ୟୁନିଭର୍ସିଟି ଅଫ ୱାଶିଂଟନ ଏବଂ ଲାନସେର ଗବେଷଣାରୁ ଜଣାଯାଇଛି। ଡିସେମ୍ବର ୨୦୨୧ ସୁଦ୍ଧା ଯେତିକି ମୃତ୍ୟୁ ସଂଖ୍ୟା ରେକର୍ଡଭୁକ୍ତ ହୋଇଛି ବାସ୍ତବରେ ତିନିଗୁଣା ଲୋକ ପ୍ରାଣ ହରାଇଛନ୍ତି ବୋଲି ଏଥିରେ କୁହାଯାଇଛି। ସବୁଠାରୁ ଚାଞ୍ଚଲ୍ୟକର ତଥ୍ୟ ହେଉଛି କେବଳ ଭାରତରେ ୨୨ ପ୍ରତିଶତ ଲୋକଙ୍କର ମୃତ୍ୟୁ ହୋଇଛି।
ଜନବହୁଳ ଦେଶ ଭାରତ ସବୁଠାରୁ ଅଧିକ ପ୍ରଭାବିତ ହୋଇଥିବା ଏହି ଗବେଷଣାରେ ଦର୍ଶାଯାଇଛି। ଭାରତରେ ପ୍ରାୟ ୪୦ ଲକ୍ଷ ଲୋକ କୋଭିଡ ଯୋଗୁଁ ପ୍ରାଣ ହରାଇଥିବା ଏଥିରେ କୁହାଯାଇଥିବା ବେଳେ ରେକର୍ଡଭୁକ୍ତ ମୃତ୍ୟୁ ସଂଖ୍ୟା ହେଉଛି ୪ ଲକ୍ଷ ୮୦ ହଜାର। ବିହାରରେ ଯେତିକି ମୃତ୍ୟୁ ଦର୍ଶାଯାଇଛି ତାଠାରୁ ୨୬ ପ୍ରତିଶତ ଅଧିକ ଲୋକ ପ୍ରାଣ ହରାଇଛନ୍ତି ବୋଲି ଏଥିରେ କୁହାଯାଇଛି। ଏପ୍ରିଲରୁ ଜୁଲାଇ ୨୦୨୧ ମଧ୍ୟରେ ସର୍ବାଧିକ ମୃତ୍ୟୁ ହୋଇଥିବା ଜଣାଯାଇଛି। ଯେତେବେଳେ ଭାରତରେ କୋଭିଡର ଦ୍ବିତୀୟ ଲହର ଜାରି ରହିଥିଲା। ଯେଉଁସବୁ ଦେଶରେ ବାସ୍ତବ ମୃତ୍ୟୁ ସଂଖ୍ୟା ରେକର୍ଡଭୁକ୍ତ ମୃତ୍ୟୁ ସଂଖ୍ୟା ଠାରୁ ଅଧିକ ରହିଛି ସେ ମଧ୍ୟରେ ଭାରତ ପରେ ଆମେରିକା, ରୁଷ, ମେକ୍ସିକୋ, ଇଣ୍ଡୋନେସିଆ, ବ୍ରାଜିଲ ଓ ପାକିସ୍ତାନ ରହିଛି ।
