କାଠମାଣ୍ଡୁ: ଭୟଙ୍କର ବନ୍ୟା ଓ ଭୂସ୍ଖଳନ ପରେ ନେପାଳର ଚିଲିମେ ଟନେଲରେ ଫସିଥିବା ଲୋକଙ୍କୁ ଉଦ୍ଧାର ପାଇଁ ଭାରତ ଓ ନେପାଳର ଉଦ୍ଧାରକାରୀ ଦଳ ମିଳିତ ଭାବେ ଅଭିଯାନ ଜାରି ରଖିଛନ୍ତି। ଟନେଲ ଭିତରେ ପ୍ରବଳ କାଦ, ପାଣି ଓ ଭାରୀ ଆବର୍ଜନା ଥିବାରୁ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହେଉଛି। ତଥାପି ଉଦ୍ଧାରକାରୀ ଦଳ ଭାରୀ ଆବର୍ଜନା ହଟାଇ ଟନେଲର ଗଭୀର ଅଞ୍ଚଳକୁ ଭାରୀ ଯନ୍ତ୍ରପାତି ପହଞ୍ଚାଇବାକୁ ପ୍ରୟାସ କରୁଛନ୍ତି।
ଭାରତୀୟ ଦୂତାବାସ ଅନୁସାରେ, ଟନେଲ ଭିତରେ ପାଣି ଓ କାଦ ପ୍ରାୟ ଛାତ ପର୍ଯ୍ୟନ୍ତ ପହଞ୍ଚିଛି। ଏହି କାରଣରୁ ନିକଟସ୍ଥ ସ୍ୟାଫ୍ରୁବେସିରୁ ଟନେଲ ମୁହାଣ ପର୍ଯ୍ୟନ୍ତ ଏକ ରାସ୍ତା ନିର୍ମାଣ କରାଯାଉଛି, ଯାହା ଦ୍ୱାରା ଏକ୍ସକାଭେଟର ଭିତରକୁ ନେଇ ଉଦ୍ଧାର କାର୍ଯ୍ୟ ତ୍ୱରାନ୍ୱିତ କରାଯାଇପାରିବ। ଦୁର୍ଗମ ପାହାଡ଼ିଆ ଅଞ୍ଚଳ ଓ ସଂକୀର୍ଣ୍ଣ ଉପତ୍ୟକା ଯୋଗୁଁ ହେଲିକପ୍ଟରର ବ୍ୟାପକ ବ୍ୟବହାର ସମ୍ଭବ ହେଉନାହିଁ।
ଏହି ସଙ୍କଟ ସମୟରେ ଭାରତ ନେପାଳକୁ ମାନବୀୟ ସହାୟତା ମଧ୍ୟ ଯୋଗାଇ ଦେଉଛି। ଏପର୍ଯ୍ୟନ୍ତ ୭ଟି ବିମାନ ଯୋଗେ ପ୍ରାୟ ୯୫ ଟନ୍ ରିଲିଫ୍ ସାମଗ୍ରୀ ଓ ୫୪ ଜଣ ବିଶେଷଜ୍ଞଙ୍କୁ ପଠାଯାଇଛି। ଏଥିରେ ୩୦ ଜଣ ଟନେଲ ଉଦ୍ଧାର ବିଶେଷଜ୍ଞ, ୧୯ ଜଣ ଫରେନ୍ସିକ୍ ବିଶେଷଜ୍ଞ ଓ ୫ ଜଣିଆ ମେଡିକାଲ ଟିମ୍ ରହିଛନ୍ତି।
