ପୁଣି ଅଶାନ୍ତ ମଣିପୁର, ଘରେ ପଶି ଗୁଳି କରୁଛନ୍ତି ଆତଙ୍କବାଦୀ

ଗୌହ୍ୱାଟୀ, 7 ସେପ୍ଟେମ୍ବର – ପୁଣି ଅଶାନ୍ତ ମଣିପୁର, ଘରେ ପଶି ଗୁଳି କରୁଛନ୍ତି ଆତଙ୍କବାଦୀ । ମଣିପୁରର ଜିରିବାମ ଜିଲ୍ଲାରେ ହୋଇଥିବା ଗୁଳିକାଣ୍ଡରେ 5ଜଣଙ୍କ ମୃତ୍ୟୁ ହୋଇଛି । ଜିରିବାମ ଜିଲ୍ଲା ମୁଖ୍ୟାଳୟରୁ 6 କିଲୋମିଟର ଦୂରରେ ଶନିବାର ସକାଳେ ଏହି ଘଟଣା ଘଟିଛି ।

ମଣିପୁର ପୋଲିସ ମୁତାବକ ଜଣେ ବ୍ୟକ୍ତି ଶୋଇଥିବା ସମୟରେ ଅଜ୍ଞାତ ଆତତାୟୀମାନେ ଗୁଳି ମାରି ହତ୍ୟା କରିଥିଲେ । ଏହାପରେ ହୋଇଥିବା ଗୁଳିକାଣ୍ଡରେ ଅନ୍ୟ 4ଜଣ ଅସ୍ତ୍ରଶସ୍ତ୍ରଧାରୀ ଲୋକଙ୍କ ମୃତ୍ୟୁ ହୋଇଛି । ସୂଚନା ମୁତାବକ ଆତଙ୍କବାଦୀ ଶୁନଶାନ ଅଂଚଳରେ ଏକୁଟିଆ ରହୁଥିବା ଜଣେ ବ୍ୟକ୍ତିଙ୍କ ଘର ଭିତରକୁ ପଶିଆସିଥିଲେ ଏବଂ ଶୋଇଥିବା ସମୟରେ ତାକୁ ଗୁଳି କରି ହତ୍ୟା କରିଥିଲେ । ହତ୍ୟା ପରେ ପାହାଡିଆ ଅଂଚଳରେ ଦୁଇ ସମୁଦାୟର ଅସ୍ତ୍ରଶସ୍ତ୍ରଧାରୀ ଲୋକଙ୍କ ମଧ୍ୟରେ ଗୁଳିକାଣ୍ଡ ହୋଇଥିଲା, ଯେଉଁଥିରେ ତିନି ଆତଙ୍କବାଦୀଙ୍କ ସହିତ 4ଜଣଙ୍କ ମୃତ୍ୟୁ ହୋଇଛି । ଘଟଣାପରେ ପୂରା ଅଂଚଳରେ ନାକାବନ୍ଦୀ କରାଯାଇ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି ।