ମୟୂରଭଞ୍ଜ ଜିଲାରେ ତଳମୁହାଁ ପାରଦ। ଲଗାତାର ତିନି ଦିନ ହେଲାଣି ଶିମିଳିପାଳ ଜାତୀୟ ଉଦ୍ୟାନରେ ତାପମାତ୍ରା ୬ ଡିଗ୍ରୀ ସେଲସିୟସ ଥିବା ରେକର୍ଡ କରାଯାଇଥିଲା। ବନ ବିଭାଗର ସୂଚନା ଅନୁଯାୟୀ, ଆଜି ଶିମିଳପାଳରେ ତାପମାତ୍ରା ୫ ଡିଗ୍ରୀକୁ ଖସିଛି। ଫଳରେ ଶିମିଳିପାଳ ଏବଂ ପାଦ ଦେଶରେ ଥିବା ଗାଁଗୁଡ଼ିକରେ ହାଡ଼ଭଙ୍ଗା ଶୀତ ଅନୁଭୂତ ହେଉଛି।
ଶିମିଳିପାଳ ଜାତୀୟ ଉଦ୍ୟାନ ଉପର ବାରାକାମୁଡ଼ା ଅଞ୍ଚଳରେ ଆଜି ତାପମାତ୍ରା ୫ ଡିଗ୍ରୀ ଥିବାବେଳେ ଚହଲାରେ ୮ ଡିଗ୍ରୀ ରହିଛି। ଓଡିଶାରେ ସର୍ବନିମ୍ନ ତାପମାତ୍ରା ଶିମିଳିପାଳରେ ରହିଛି। ଏଠାରେ ହସ୍ତୀ ଏବଂ ବ୍ୟାଘ୍ର ପ୍ରକଳ୍ପ ଥିବାରୁ ପାଣିପାଗ ବିଭାଗ ତାପମାତ୍ରା ରେକର୍ଡ କରିପାରେ ନାହିଁ। କେବଳ ବନ ବିଭାଗ ତାପମାତ୍ରା ରେକର୍ଡ କରି ସୂଚନା ଦେଇଥାଏ।
