ଉଷୁନା ଚାଉଳ ରପ୍ତାନୀ ଉପରେ କଟକଣା

ଉଷୁନା ଚାଉଳ ରପ୍ତାନି ଉପରେ କେନ୍ଦ୍ର ସରକାର ୨୦ ପ୍ରତିଶତ ରପ୍ତାନି ଶୁଳ୍କ ଲଗାଇଛନ୍ତି। ଦେଶରେ ପର୍ଯ୍ୟାପ୍ତ ପରିମାଣରେ ସ୍ଥାନୀୟ ଷ୍ଟକ୍ ବଜାୟ ରଖିବା ଏବଂ ଘରୋଇ ଦରକୁ ନିୟନ୍ତ୍ରଣରେ ରଖିବା ଉଦ୍ଦେଶ୍ୟରେ ଏହି ପଦକ୍ଷେପ ନିଆଯାଇଛି। ପୂର୍ବରୁ ବାସମତୀ ଚାଉଳବ୍ୟତୀତ ଅନ୍ୟ ସମସ୍ତ ପ୍ରକାର ଚାଉଳ ରପ୍ତାନି ଉପରେ ସରକାର କଟକଣା ଲଗାଇଥିଲେ। ରପ୍ତାନି ଶୁଳ୍କ ଲାଗୁ ହେଲେ ଭାରତର ଚାଉଳ ରପ୍ତାନି ହ୍ରାସ ପାଇବ, ଯାହା ଆମେରିକା, ଥାଇଲାଣ୍ଡ ସମେତ ବିଦେଶୀ ବଜାରରେ ଚାଉଳ ଦର ବୃଦ୍ଧି କରିବ।

ଅର୍ଥ ମନ୍ତ୍ରଣାଳୟ କହିଛି ଯେ କେନ୍ଦ୍ର ସରକାର ଉଷୁନା ଚାଉଳ ଉପରେ ୨୦ ପ୍ରତିଶତ ରପ୍ତାନି ଶୁଳ୍କ ଲଗାଇଛନ୍ତି। ଏହି ଆଦେଶ ଅଗଷ୍ଟ ୨୫ରୁ କାର୍ଯ୍ୟକାରୀ ହେଉଛି, ଯାହା ୨୦୨୩ ଅକ୍ଟୋବର ୧୬ ପର୍ଯ୍ୟନ୍ତ ବଳବତ୍ତର ରହିବ। ବନ୍ଦରରେ ପଡ଼ିଥିବା ଉଷୁନା ଚାଉଳ ଉପରେ ଏହି ଶୁଳ୍କ ଲାଗୁ ହେବ ନାହିଁ ।

ଏହି କଟକଣା ଯୋଗୁଁ ଭାରତ ଏବେ ବାସମତୀ ଚାଉଳ ବ୍ୟତୀତ ଅନ୍ୟ ସମସ୍ତ ପ୍ରକାର ଚାଉଳର ରପ୍ତାନି ଉପରେ ପ୍ରତିବନ୍ଧକ ଲଗାଇଛି। ଦେଶରୁ ରପ୍ତାନି ହେଉଥିବା ମୋଟ ଚାଉଳର ପ୍ରାୟ ୨୫ ପ୍ରତିଶତ ଅଣ-ବାସମତୀ ଧଳା ଚାଉଳ। ଆଗାମୀ ପର୍ବପର୍ବାଣୀ ଋତୁରେ ଘରୋଇ ଯୋଗାଣ ବଜାୟ ରଖିବା ଏବଂ ଖୁଚୁରା ଦରକୁ ନିୟନ୍ତ୍ରଣରେ ରଖିବା ପାଇଁ ଗତ ମାସରେ ସରକାର ବାସମତୀ ଚାଉଳ ବ୍ୟତୀତ ଅନ୍ୟ ସମସ୍ତ ପ୍ରକାର ଧଳା ଚାଉଳ ରପ୍ତାନି ଉପରେ ପ୍ରତିବନ୍ଧକ ଲଗାଇଥିଲେ।