ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର କେରଳର ଦୁଇ ପ୍ରମୁଖ ରାଜନୈତିକ ମୋର୍ଚ୍ଚା—ବାମ ଗଣତାନ୍ତ୍ରିକ ମୋର୍ଚ୍ଚା ଓ ଯୁକ୍ତ ଗଣତାନ୍ତ୍ରିକ ମୋର୍ଚ୍ଚା—ଉପରେ ତୀବ୍ର ଆକ୍ରମଣ କରି ସେମାନଙ୍କୁ “ଏକ ସମାନ ” ବୋଲି ଅଭିଯୋଗ କରିଛନ୍ତି।
ଜାତୀୟ ଗଣତାନ୍ତ୍ରିକ ମୋର୍ଚ୍ଚାର ବିଶାଳ ଜନସଭାକୁ ସମ୍ବୋଧନ କରି ସେ କହିଥିଲେ ଯେ, ଏହି ଦୁଇ ଶିବିର ବାହ୍ୟରେ ପ୍ରତିଦ୍ୱନ୍ଦୀ ଭାବେ ଦେଖାଯାଉଥିବା ସତ୍ୱେ ମଧ୍ୟ, ଭିତରେ ସେମାନଙ୍କ ମଧ୍ୟରେ ଗୁପ୍ତ ସମଝୌତା ରହିଛି ଏବଂ ସେମାନଙ୍କ ଲକ୍ଷ୍ୟ ହେଉଛି ଭାରତୀୟ ଜନତା ପାର୍ଟିକୁ ରୋକିବା।
ପ୍ରଧାନମନ୍ତ୍ରୀ କହିଥିଲେ, “ଆମ ଉପରେ ସେମାନଙ୍କ ଆକ୍ରମଣ ପ୍ରତିସ୍ପର୍ଦ୍ଧାରୁ ନୁହେଁ, ଭୟରୁ ହେଉଛି।” ସେ ଆହୁରି କହିଥିଲେ ଯେ, ଆଇନ-ଶୃଙ୍ଖଳା ଓ ସାମ୍ପ୍ରଦାୟିକ ସମ୍ପ୍ରୀତି ନେଇ ଦୁଇଁ ଦଳ ଭୋଟ୍ ବ୍ୟାଙ୍କ ରାଜନୀତି କରୁଛନ୍ତି।
ସବରିମଲା ମନ୍ଦିର ମାମଲା ଉପରେ ମଧ୍ୟ ସେ ଦୁଇଁ ମୋର୍ଚ୍ଚାକୁ ଦୋଷାରୋପ କରି କହିଥିଲେ ଯେ, ମନ୍ଦିରର ପବିତ୍ରତା ରକ୍ଷାରେ ସେମାନେ ବିଫଳ ହୋଇଛନ୍ତି।
ଏହାସହ ସେ ନାଗରିକତା ସଂଶୋଧନ ଆଇନ ଓ ବିଦେଶୀ ଅନୁଦାନ ନିୟମ ସମ୍ବନ୍ଧରେ ଭ୍ରାନ୍ତିକର ପ୍ରଚାର କରାଯାଉଥିବା ଅଭିଯୋଗ ମଧ୍ୟ କରିଥିଲେ।
କେରଳ ପାଇଁ ନୂଆ ଉନ୍ନତି ମଡେଲ୍ ପ୍ରସ୍ତାବ କରି ସେ କହିଥିଲେ, “ଗତ ୫୦ ବର୍ଷରେ ଯାହା ହୋଇନାହିଁ, ଆମେ ୫ ବର୍ଷରେ କରିବାକୁ ପ୍ରୟାସ କରିବୁ।”
ସଭାରେ ସେ ଦଳର ପ୍ରାର୍ଥୀ ଅନୁପ ଆଣ୍ଟୋନି ଜୋସେଫଙ୍କୁ ନିଜର “ଡାହାଣ ହାତ” ବୋଲି ବର୍ଣ୍ଣନା କରି ତାଙ୍କ ପ୍ରତି ଆସ୍ଥା ବ୍ୟକ୍ତ କରିଥିଲେ।
ମହିଳା ସଶକ୍ତିକରଣକୁ ଗୁରୁତ୍ୱ ଦେଇ ସେ କହିଥିଲେ ଯେ, ବିଧାନମଣ୍ଡଳରେ ୩୩ ପ୍ରତିଶତ ମହିଳା ଆସନ ସଂରକ୍ଷଣ ୨୦୨୯ ନିର୍ବାଚନରେ କାର୍ଯ୍ୟକରୀ ହେବ। ଏହା ପାଇଁ ସମସ୍ତ ଦଳର ସମର୍ଥନ ଆବଶ୍ୟକ ବୋଲି ସେ ଆହ୍ୱାନ କରିଥିଲେ।
ପ୍ରଧାନମନ୍ତ୍ରୀ ଏହା ମଧ୍ୟ କହିଥିଲେ ଯେ, କେନ୍ଦ୍ର ସରକାର କେରଳର ଉନ୍ନତି ପାଇଁ ପୂର୍ବପେକ୍ଷା ବହୁଗୁଣା ଅର୍ଥ ସହାୟତା ଦେଇଛି। “ଡବଲ୍ ଇଞ୍ଜିନ୍ ସରକାର” ଗଠିତ ହେଲେ ରାଜ୍ୟରେ ଉନ୍ନତି ଆହୁରି ତ୍ୱରାନ୍ୱିତ ହେବ ବୋଲି ସେ ଦାବି କରିଥିଲେ।
ଆସନ୍ତା ଏପ୍ରିଲ୍ ୯ରେ କେରଳରେ ମତଦାନ ହେବାକୁ ଯାଉଥିବାବେଳେ, ଏହି ଜନସଭାକୁ ନିର୍ବାଚନ ପୂର୍ବରୁ ଏକ ଗୁରୁତ୍ୱପୂର୍ଣ୍ଣ ରାଜନୈତିକ ସନ୍ଦେଶ ଭାବେ ଦେଖାଯାଉଛି।
