ନୂଆଦିଲ୍ଲୀ : କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି ଯେ ‘ଅପରେସନ ସିନ୍ଦୂର’ ଭାରତ ନିଜ ଇଚ୍ଛା ଓ ସର୍ତ୍ତରେ ବନ୍ଦ କରିଥିଲା। ସେ ସ୍ପଷ୍ଟ କରିଦେଇଛନ୍ତି ଯେ ସେହି ସମୟରେ ଦେଶ ଏକ ଦୀର୍ଘ ଯୁଦ୍ଧ ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଥିଲା ଓ ଯେକୌଣସି ପରିସ୍ଥିତିକୁ ମୁକାବିଲା କରିବାର କ୍ଷମତା ରଖୁଥିଲା।
ଦିଲ୍ଲୀରେ ଆୟୋଜିତ ଜାତୀୟ ସୁରକ୍ଷା ସମ୍ମିଳନୀ ୨.୦ରେ ସମ୍ବୋଧନ କରି ସେ ପାକିସ୍ତାନକୁ ଅନ୍ତର୍ଜାତୀୟ ଆତଙ୍କବାଦର କେନ୍ଦ୍ର ବୋଲି ଅଭିହିତ କରିଥିଲେ। ସେ କହିଥିଲେ ଯେ ଆତଙ୍କବାଦର ମୂଳକୁ ସମ୍ପୂର୍ଣ୍ଣ ଭାବେ ଉଚ୍ଛିନ୍ନ କରିବା ଆବଶ୍ୟକ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ଏବେ ଆତଙ୍କବାଦ ବିରୋଧରେ ‘ଶୂନ୍ୟ ସହନଶୀଳତା’ ନୀତି ଅନୁସରଣ କରୁଛି ବୋଲି ସେ ଉଲ୍ଲେଖ କରିଥିଲେ।
ରାଜନାଥ ସିଂହ ଆହୁରି କହିଥିଲେ ଯେ ଭାରତ ଏବେ କେବଳ କୂଟନୈତିକ ବିବୃତ୍ତିରେ ସୀମିତ ରହୁନାହିଁ, ବରଂ ଆତଙ୍କବାଦୀ ଆକ୍ରମଣ ପାଇଁ ନିର୍ଣ୍ଣାୟକ ପଦକ୍ଷେପ ନେଉଛି। ‘ଅପରେସନ ସିନ୍ଦୂର’ ସମୟରେ ଭାରତ ସେହି ସ୍ଥାନଗୁଡ଼ିକୁ ଟାର୍ଗେଟ କରିଥିଲା, ଯେଉଁଠାରୁ ଦେଶ ଉପରେ ଆକ୍ରମଣ ହୋଇଥିଲା।
ସେ ଜୋର ଦେଇ କହିଥିଲେ ଯେ କ୍ଷମତା ଅଭାବରୁ ନୁହେଁ, ବରଂ ଭାରତର ସ୍ୱେଚ୍ଛାକୃତ ନିଷ୍ପତ୍ତି ଫଳରେ ଏହି ଅପରେସନକୁ ବନ୍ଦ କରାଯାଇଥିଲା।
