ନୂଆଦିଲ୍ଲୀ, 10 ଫେବୃଆରୀ – ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଦିଲ୍ଲୀର ପ୍ରତିଷ୍ଠିତ ସୁନ୍ଦର ନର୍ସରୀରେ ପରୀକ୍ଷା ପେ ଚର୍ଚ୍ଚାର ଅଷ୍ଟମ ସଂସ୍କରଣରେ ବିଦ୍ୟାର୍ଥୀଙ୍କ ସହ ଚାପ ମୁକ୍ତ ପରୀକ୍ଷାର ବିଭିନ୍ନ ପଦକ୍ଷେପ ଉପରେ ଆଲୋଚନା କରିଛନ୍ତି । ସେ କହିଛନ୍ତି ଯେ, ଛାତ୍ରଛାତ୍ରୀଙ୍କୁ ସୀମିତ କରିବା ଉଚିତ ନୁହେଁ, ସେମାନଙ୍କୁ ନିଜ ଇଚ୍ଛାରେ କାର୍ଯ୍ୟ କରିବା ପାଇଁ ସ୍ୱାଧୀନତା ମିଳିବା ଉଚିତ ।
ପ୍ରଧାନମନ୍ତ୍ରୀ ପରୀକ୍ଷାର୍ଥୀଙ୍କୁ ପରୀକ୍ଷା ସମୟରେ ଚାପରୁ ଦୂରେଇ ରହିବା ପାଇଁ ସମୟ ପ୍ରବନ୍ଧନ ଓ କଠିନ ବିଷୟକୁ ନିଜେ ଚ୍ୟାଲେଂଜ ଦେବାକୁ ପରାମର୍ଶ ଦେଇଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ, ଆମ ସମାଜରେ ଦୁର୍ଭାଗ୍ୟରୁ ଏହା ବସା ବାନ୍ଧିଛି ଯେ, ଯଦି ଆମେ ସ୍କୁଲରେ ଏତିକି ନମ୍ବର ଆଣିପାରିବା ନାହିଁ, ଦଶମ-ଦ୍ୱାଦଶରେ ଏତିକି ନମ୍ବର ଆସିବନି ତେବେ ଜୀବନ ନଷ୍ଟ ହୋଇଯିବ । ଏଥିପାଇଁ ସଂପୂର୍ଣ୍ଣ ଘର ଚାପଗ୍ରସ୍ତ ହୋଇଯାଏ । ଏଭଳି ପରିସ୍ଥିତିରେ ଆପଣଙ୍କୁ ନିଜକୁ ପ୍ରସ୍ତୁତ କରିବାକୁ ପଡିବ । ସେ କହିଛନ୍ତି ଯେ, ଏଭଳି ପରିସ୍ଥିତିରେ ଏହି ଚାପକୁ ମନକୁ ନିଅନ୍ତୁ ନାହିଁ ଏବଂ ନିଶ୍ଚିତ କରନ୍ତୁ ଯେ, ଆପଣଙ୍କୁ ଆଜି କେତିକି ପଢିବାର ଅଛି । ଯଦି ଆପଣ ଏହା ନିର୍ଦ୍ଧାରଣ କରିନେବେ ତେବେ ଏହି ଚାପରୁ ନିଜେ ବାହାରିପାରିବେ ।
