ରାଷ୍ଟ୍ରପତି ଭ୍ଲାଦିମିର ପୁଟିନ୍ ମସ୍କୋର ପରମାଣୁ ନୀତି ବଦଳାଇବାର ଗୋଟିଏ ଦିନ ପରେ ରୁଷ୍ ୟୁକ୍ରେନ୍ ଉପରକୁ ଏକ ଆନ୍ତଃମହାଦେଶୀୟ ବ୍ୟାଲିଷ୍ଟିକ୍ କ୍ଷେପଣାସ୍ତ୍ର ଆଇସିବିଏମ୍ ନିକ୍ଷେପ କରିଛି। ଆମେରିକା ରାଷ୍ଟ୍ରପତି ଜୋ ବାଇଡେନ ଏବଂ ବ୍ରିଟେନ ପ୍ରଧାନମନ୍ତ୍ରୀ କିର ଷ୍ଟାରମର ୟୁକ୍ରେନକୁ ପଶ୍ଚିମ ଦୂରଗାମୀ କ୍ରୁଜ୍ ଏବଂ ବ୍ୟାଲିଷ୍ଟିକ୍ କ୍ଷେପଣାସ୍ତ୍ର ବ୍ୟବହାର କରି ଋଷୀୟ ଅଞ୍ଚଳର ଗଭୀର ଅଞ୍ଚଳକୁ ଟାର୍ଗେଟ କରିବାକୁ ଅନୁମତି ଦେବାର କିଛି ଦିନ ପରେ ମସ୍କୋ ଏହି କଡ଼ା ଜବାବ ଦେଇଛି। ୱାଶିଂଟନ ଓ ଲଣ୍ଡନରୁ ଏହି ଅନୁମୋଦନ ମିଳିବାର କିଛି ଘଣ୍ଟା ମଧ୍ୟରେ କିଭ୍ ଆମେରିକା ନିର୍ମିତ ଏଟିଏସିଏମଏସ କ୍ଷେପଣାସ୍ତ୍ର ଏବଂ ଋଷୀୟ ଅଞ୍ଚଳକୁ ଟାର୍ଗେଟ କରି ବ୍ରିଟେନ ନିର୍ମିତ ‘ଷ୍ଟୋର୍ମ ଶେଡୋ’ କ୍ଷେପଣାସ୍ତ୍ର ନିକ୍ଷେପ କରିଥିଲା। ୟୁକ୍ରେନର ବାୟୁସେନା ଆଜି ଏକ ବିବୃତି ଜାରି କରି କହିଛି ଯେ ରୁଷୀୟ ସେନା ଆଜି ସକାଳେ କେନ୍ଦ୍ରୀୟ ୟୁକ୍ରେନର ଡିନିପ୍ରୋ ସହର ଉପରକୁ ବିଭିନ୍ନ ପ୍ରକାରର କ୍ଷେପଣାସ୍ତ୍ର ପ୍ରକ୍ଷେପଣ କରିଛି।
