ମୁମ୍ବାଇ- ବାନ୍ଦ୍ରା ଟର୍ମିନସ ରେଲୱେ ଷ୍ଟେସନରେ ରବିବାର ସକାଳେ ଯାତ୍ରୀଙ୍କ ଭିଡ କାରଣରୁ ହଠାତ୍ ଦଳାଚକଟା ପରିସ୍ଥିତି ସୃଷ୍ଟି ହୋଇଥିଲା । ଦଳଚକଟାରେ 9ଜଣ ଯାତ୍ରୀ ଆହତ ହୋଇଛନ୍ତି । ଏହି ସମସ୍ତଙ୍କୁ ତୁରନ୍ତ ବାନ୍ଦ୍ରା ଭାଭା ହସ୍ପିଟାଲରେ ଭର୍ତ୍ତି କରାଯାଇଛି । ଆହତଙ୍କ ମଧ୍ୟରେ ଦୁଇଜଣଙ୍କ ସ୍ଥିତି ଗମ୍ଭୀର ରହିଛି । ରେଲୱେ ପୋଲିସ ଘଟଣାର ତଦନ୍ତ କରୁଛି ।
ସୂଚନା ମୁତାବକ ଆଜି ସକାଳେ ବାନ୍ଦ୍ରା ରେଲୱେ ଷ୍ଟେସନର ପ୍ଲାଟଫର୍ମ ନମ୍ବର 1ରେ ବହୁ ସଂଖ୍ୟାରେ ଯାତ୍ରୀ ବାନ୍ଦ୍ରା-ଗୋରଖପୁର ଏକ୍ସପ୍ରେସ ଗାଡିରେ ଚଢିବାକୁ ଆସିଥିଲେ । ଏମାନଙ୍କ ମଧ୍ୟରେ ଅଧିକାଂଶ ଯାତ୍ରୀ ଦୀପାବଳୀ ଓ ଛଟ୍ ପର୍ବ ପାଇଁ ନିଜ ଘରକୁ ଯିବାକୁ ବାହାରିଥିଲେ । ଅତ୍ୟଧିକ ଭିଡ ମଧ୍ୟରେ ଯାତ୍ରୀମାନେ ଟ୍ରେନରେ ଚଢିବାକୁ ଉଦ୍ୟମ କରିଥିଲେ । ଏହି ସମୟରେ ଦଳଚକଟା ପରିସ୍ଥିତି ସୃଷ୍ଟି ହୋଇଥିଲା ।
