ଭୁବନେଶ୍ୱର: ରାଜଧାନୀରେ ଝୁଲନ୍ତା ଅବସ୍ଥାରେ ଯୁବକଙ୍କ ମୃତଦେହ ଉଦ୍ଧାର । ନିୟୁ ଫରେଷ୍ଟ ପାର୍କ ଅଂଚଳରୁ ଏଭଳି ଘଟଣା ସାମ୍ନାକୁ ଆସିଛି । ମୃତ ଯୁବକ ଜଣକ ହେଲେ ଜ୍ୟୋତି ରଂଜନ ସାହୁ ଏବଂ ତାଙ୍କ ଘର ଖୋର୍ଦ୍ଧା ସରପାରି ଗାଁରେ । ଏ ପର୍ଯ୍ୟନ୍ତ ମୃତ୍ୟର କାରଣ ବିଷୟରେ କୌଣସି ତଥ୍ୟ ଜଣାପଡିନାହିଁ । ତେବେ ମୃତ ଯୁବକଙ୍କ ହାତରେ କଡ଼ି ବନ୍ଧା ହୋଇଥିବାରୁ କେହି ହତ୍ୟା କରିଥିବା ସନ୍ଦେହ କରୁଛନ୍ତି ପରିବାର ଲୋକ । ଏନେଇ ଥାନାରେ ଅଭିଯୋଗ କରିଛନ୍ତି ପରିବାର ଲୋକେ ।
ସୂଚନା ଅନୁଯାୟୀ , ଜ୍ୟୋତି ଖୋର୍ଦ୍ଧା ନିରାକାରପୁର କଲେଜରେ ଯୁକ୍ତ ୩ ରେ ପାଠ ପଢ଼ୁଥିଲେ । ମୃତ ଶରୀରକୁ ଜବତ କରି ଏୟାରପୋର୍ଟ ଥାନା ପୋଲିସ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲ ପଠାଇଛି । ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ପୋଲିସ ।। ସନ୍ଦେହଜନକ ଭାବେ ତାଙ୍କର ମୃତଦେହ ଉଦ୍ଧାର ହୋଇଛି । କେହି ତାଙ୍କୁ ମାରି ଦେଇ ଟାଙ୍ଗି ଦେଇଥିବା ପରିବାର ପକ୍ଷରୁ ଅଭିଯୋଗ ହୋଇଛି । ପୋଲିସ ମଧ୍ୟ ଘଟଣାସ୍ଥଳରେ ଛାନଭିନ କରିବା ସହ ପଡିଶା ଲୋକଙ୍କୁ ପଚରା ଉଚରା କରୁଛି ।
