ପ୍ରେମିକା ଘରୁ ଉଦ୍ଧାର ହେଲା ପ୍ରେମିକର ଝୁଲନ୍ତା ମୃତଦେହ । ଏପରି ଅଭାବନୀୟ ଘଟଣା ଘଟିଛି ପୁରୀ ଜିଲ୍ଲା ବ୍ରହ୍ମଗିରି ଥାନା ଅନ୍ତର୍ଗତ ସାହୁପଡ଼ା ଗାଁରେ । ଏହା ହତ୍ୟା ନା ଆତ୍ମହତ୍ୟା , ଏ ପର୍ଯ୍ୟନ୍ତ ସ୍ପଷ୍ଟ ହୋଇପାରିନାହିଁ । ମୃତ ଯୁବକ ହେଲେ ସୂର୍ଯ୍ୟକାନ୍ତ ବିଶ୍ୱାଳ।
ମିଳିଥିବା ସୂଚନା ଅନୁସାରେ, ସାହୁପଡ଼ା ଗାଁର ଶଙ୍କର୍ଷଣ ବେହେରାଙ୍କ ଝିଅଙ୍କ ସହ ସୂର୍ଯ୍ୟକାନ୍ତଙ୍କ ପ୍ରାୟ ୪ ବର୍ଷ ହେବ ପ୍ରେମ ସମ୍ପର୍କ ଥିଲା । ଗତକାଲି ଶଙ୍କର୍ଷଣଙ୍କ ଘରକୁ ସୂର୍ଯ୍ୟକାନ୍ତ ଯାଇଥିବା ବେଳେ କୌଣସି କାରଣକୁ ନେଇ ପାଟିତୁଣ୍ଡ ହୋଇଥିଲା । ଏହାର କିଛି ସମୟ ପରେ ଶଙ୍କର୍ଷଣଙ୍କ ଭିତର ଘର ଫ୍ୟାନରେ ସୂର୍ଯ୍ୟକାନ୍ତଙ୍କ ଝୁଲନ୍ତା ଅବସ୍ଥାରେ ମୃତଦେହ ମିଳିଥିଲା ଏବଂ ଘର ବାହାରେ ଏକ ମୋଟର ସାଇକେଲ ଭାଙ୍ଗି ପଡ଼ିଥିବା ଦେଖିବାକୁ ମିଳିଥିଲା । ଏନେଇ ସୂର୍ଯ୍ୟକାନ୍ତଙ୍କ ପରିବାର ଲୋକ ଅଭିଯୋଗ ଆଣିଛନ୍ତି ଯେ,ସୂର୍ଯ୍ୟକାନ୍ତକୁ ପ୍ରଥମେ ହତ୍ୟା କରିବା ପରେ ଝୁଲାଇ ଦିଆଯାଇଛି । ପାରିପାର୍ଶିକ ସ୍ଥିତିକୁ ଅନୁଧ୍ୟାନ କଲେ ଏହା ହତ୍ୟାକାଣ୍ଡ ଜଣା ପଡୁଥିବାବେଳେ ପୋଲିସ୍ ଘଟଣାସ୍ଥଳରେ ପହଞ୍ଚି ଛାନଭିନ ଆରମ୍ଭ କରିବା ସହ ଯୁବତୀଙ୍କ ପରିବାର ଲୋକଙ୍କୁ ଅଟକ ରଖି ପଚରାଉଚରା କରୁଛି ।
