ସୋନପୁର : ଯୁବକଙ୍କୁ ଧକ୍କା ଦେବାପରେ ଭାରସାମ୍ୟ ହରାଇ ଓଲଟିଲା ବସ୍ । ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି ସୁବର୍ଣ୍ଣପୁର-ସମ୍ବଲପୁର ରାସ୍ତାର ବିଶିପଡା ଓ ନାୟକପଡା ମଝିରେ । ଘଟଣାସ୍ଥଳରେ ଯୁବକ ଜଣଙ୍କର ମୃତ୍ୟୁ ହୋଇଛି । ମୃତ ଯୁବକ ହେଲେ ନାୟକପଡା ଗାଁର ଅଭିମନ୍ୟୁ ସାହୁ ।
ସୂଚନା ମୁତାବକ , ଏକ ଘରୋଇ ବସ୍ ବାହାଘର ସାରି ବୀରମହାରାଜପୁରକୁ ଫେରୁଥିବା ସମୟରେ ଏପରି ଦୂର୍ଘଟଣାର ସମ୍ମୁଖୀନ ହୋଇଛି । ଗାଡିରେ କୌଣସି ଯାତ୍ରୀ ନଥିବା ଯୋଗୁଁ ଦ୍ରୁତ ଗତିରେ ଗାଡିଟି ଆସୁଥିଲା । ତେବେ ନାୟକପଡା ନିକଟରେ ଏକ ଗାଡିକୁ ସାଇଡ୍ ଦେବାକୁ ଯାଇ ରାସ୍ତା କଡରେ ଛିଡା ହୋଇଥିବା ଜଣେ ଯୁବକଙ୍କୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ଯୁବକଙ୍କ ମୃତ୍ୟୁ ଘଟିଥିଲା । ଯୁବକଙ୍କୁ ଧକ୍କା ଦେଇ ଗାଡିଟି ଭାରସାମ୍ୟ ହରାଇ ରାସ୍ତା କଡକୁ ଖସି ପଡିଥିବା ଜଣାପଡିଛି । ଡ୍ରାଇଭର ଓ ହେଲପର ଘଟଣାସ୍ଥଳରୁ ଫେରାର ହୋଇଯାଇଥିବା ବେଳେ ଘଟଣାସ୍ଥଳରେ ମଙ୍ଗଳବାର ରାତିରୁ ଉତ୍ତେଜନା ଲାଗିରହିଛି । କ୍ଷତିପୂରଣ ଦାବିରେ ଗ୍ରାମବାସୀ ସୁବର୍ଣ୍ଣପୁର-ସମ୍ବଲପୁର ରାସ୍ତାକୁ ଅବରୋଧ ଜାରି ରହିଛି । ଘଟଣାସ୍ଥଳରେ ବୀରମହାରାଜପୁର ପୋଲିସ ପହଞ୍ଚି ଆନ୍ଦୋଳନକାରୀମାନଙ୍କୁ ବୁଝାସୁଝା ଜାରି ରଖିଛି ।
