ଲକ୍ଷ୍ନୌ: ନର୍ସ ହାତରୁ ଖସି ଚାଲିଗଲା ସଦ୍ୟଜାତ ଶିଶୁର ଜୀବନ । ଏଭଳି ଅଭାବନୀୟ ଘଟଣା ଘଟିଛି ଲକ୍ଷ୍ନୌର ଚିନ୍ହାଟ୍ସ୍ଥିତ ମଲ୍ହୌର୍ ଅଞ୍ଚଳରେ ଥିବା ଏକ ବେସରକାରୀ ହସ୍ପିଟାଲରେ । ପ୍ରସବ ପରେ ନର୍ସ ଜଣକ ଜନ୍ମିତ ଶିଶୁକୁ ବିନା ତଉଲିଆରେ ଧରିନେଉଥିବା ସମୟରେ ହଠାତ୍ ପିଲାଟି ହାତରୁ ଖସି ପଡିଥିଲା । ଘଟଣାସ୍ଥଳରେ ହିଁ ପିଲାଟିର ମୃତ୍ୟୁ ଘଟିଥିଲା। ଏହି ଘଟଣାକୁ ନେଇ ପରିବାର ପକ୍ଷରୁ ଅଭିଯୋଗ କରାଯାଇଛି ।
ସୂଚନା ମୁତାବକ, ଗତ ୧୯ ତାରିଖ ଦିନ ଏକ ମହିଳା ଲକ୍ଷ୍ନୌର ଚିନ୍ହାଟ୍ସ୍ଥିତ ମଲ୍ହୌର୍ ଅଞ୍ଚଳର ବେସରକାରୀ ହସ୍ପିଟାଲରେ ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲେ । ପ୍ରସବ ପରେ ସଦ୍ୟଜାତ ପିଲାଟିକୁ ଏକ ନର୍ସ ତଉଲିଆରେ ନବାନ୍ଧି ଖାଲି ହାତରେ ନେଉଥିଲେ ଏହା ଫଳରେ ପିଲାଟି ତଳକୁ ଖସି ପଡିଥିଲା ଓ ତାର ମୃତ୍ୟୁ ହୋଇଥିଲା । ଏହି ସମୟରେ ପିଲାଟିର ମାଆ ଚିତ୍କାର କରିବାକୁ ଲାଗିଲେ । ମହିଳାଙ୍କ ଚିତ୍କାର ଶୁଣି ପରିବାର ଲୋକେ ଲେବର୍ ରୁମ୍ ଆଡକୁ ଧାଇଁ ଆସୁଥିବା ସମୟରେ ହସ୍ପିଟାଲରେ ଉପସ୍ଥିତ ଥିବା କର୍ତ୍ତୁପକ୍ଷ ସେମାନଙ୍କୁ ଅଟକାଇବା ପାଇଁ ଚେଷ୍ଟା କରିଥିଲେ । କୌଣସିମତେ ସେମାନେ ସେଠାରୁ ମୁକୁଳି ଆସିଥିଲେ ଏବଂ ସମସ୍ତ କଥା ଜାଣିବାକୁ ପାଇଥିଲେ ।
ଏହାପରେ ମାମଲାକୁ ଲୁଚାଇବା ପାଇଁ ହସ୍ପିଟାଲ୍ ପକ୍ଷରୁ ମଲା ଛୁଆ ଜନ୍ମ ହୋଇଛି ବୋଲି ପରିବାର ଲୋକଙ୍କୁ କୁହାଯାଇଥିବା ବେଳେ ପରିବାର ଲୋକେ ଏହି କଥାକୁ ଗ୍ରହଣ କରି ନଥିଲେ । ପରିବାର ଲୋକେ ସଂପୃକ୍ତ ନର୍ସ ଓ ହସ୍ପିଟାଲ୍ ବିରୋଧରେ ଦାୟିତ୍ବହୀନତାର ଅଭିଯୋଗ ଆଣିଥିଲେ। ପୁଲିସ୍ ଏହି ଘଟଣାର ତଦନ୍ତ କରି ହସ୍ପିଟାଲ୍ କର୍ମଚାରୀ ଓ ଉକ୍ତ ନର୍ସଙ୍କ ନାମରେ ମାମଲା ରୁଜୁ କରି ମୃତ ନବଜାତକଟିକୁ ବ୍ୟବଚ୍ଛେଦ ପାଇଁ ପଠାଇଥିଲା। ଶରୀର ବ୍ୟବଚ୍ଛେଦ ରିପୋର୍ଟରୁ ପିଲାଟିର ମୁଣ୍ଡରେ ଆଘାତ ବାଜିବାରୁ ତା’ର ମୃତ୍ୟୁ ହୋଇଥିବା ସ୍ପଷ୍ଟ ହୋଇଛି।
