ଆଫଗାନିସ୍ତାନରେ ଆଜି ହୋଇପାରେ ସରକାର ଗଠନ ପ୍ରକ୍ରିୟା

ଆଫଗାନିସ୍ତାନରେ ନୂତନ ସରକାର ଗଠନ ପାଇଁ ଉଦ୍ୟମ ଜାରି ରହିଛି । ଗଣମାଧ୍ୟମ ରିପୋର୍ଟ ଅନୁଯାୟୀ ତାଲିବାନର ରାଜନୈତିକ ମୁଖ୍ୟ ମୁଲ୍ଲା ଅବଦୁଲ ଘାନି ବାରାଦର ସରକାରଙ୍କ ନେତୃତ୍ୱ ନେବେ । ସୂତ୍ରରୁ ପ୍ରକାଶ ଯେ କତାରର ରାଜଧାନୀ ଦୋହାରେ ତାଲିବାନର ରାଜନୈତିକ କାର୍ଯ୍ୟାଳୟର ଅଧ୍ୟକ୍ଷ ମୁଲ୍ଲା ଅବଦୁଲ ଘାନି ବାରାଦର ତାଲିବାନ ସରକାରର ମୁଖ୍ୟ ହୋଇପାରନ୍ତି ।

ତାଲିବାନର ଜଣେ ବରିଷ୍ଠ ସଦସ୍ୟ କହିଛନ୍ତି ଯେ ଏହି ଦଳ ଇରାନର ନେତୃତ୍ୱରେ କାବୁଲରେ ଏକ ସରକାର ଗଠନ କରିବାକୁ ଘୋଷଣା କରିବାକୁ ଯାଉଛି ଏବଂ ଏହି ଦଳର ସର୍ବୋଚ୍ଚ ଧାର୍ମିକ ନେତା ମୁଲ୍ଲା ହେବତୁଲ୍ଲା ଅଖୁନଜଡା ଆଫଗାନିସ୍ତାନର ସର୍ବୋଚ୍ଚ କର୍ତ୍ତୃପକ୍ଷ ଭାବରେ କାର୍ଯ୍ୟ କରିବେ । ତାଲିବାନ ଆଫଗାନିସ୍ତାନକୁ ନିଜ ଅଧୀନକୁ ନେବାକୁ ଦୁଇ ସପ୍ତାହରୁ ଅଧିକ ସମୟ ବିତିଗଲାଣି ।

ତାଲିବାନର ସୂଚନା ଓ ସାଂସ୍କୃତିକ ଆୟୋଗର ଜଣେ ବରିଷ୍ଠ ଅଧିକାରୀ ମୁଫତି ଇନାମୁଲ୍ଲା ସାମଙ୍ଗାନି କହିଛନ୍ତି ଯେ ନୂତନ ସରକାରଙ୍କ ଉପରେ ପରାମର୍ଶ ପ୍ରାୟ ସମ୍ପୂର୍ଣ୍ଣ ହୋଇଛି ଏବଂ କ୍ୟାବିନେଟ ସମ୍ପର୍କରେ ମଧ୍ୟ ଆବଶ୍ୟକ ଆଲୋଚନା ହୋଇଛି । ଇରାନରେ ସର୍ବୋଚ୍ଚ ନେତା ହେଉଛନ୍ତି ଦେଶର ସର୍ବୋଚ୍ଚ ରାଜନୈତିକ ଏବଂ ଧାର୍ମିକ ପ୍ରାଧିକରଣ । ରାଷ୍ଟ୍ରପତିଙ୍କ ଅପେକ୍ଷା ତାଙ୍କର ଉଚ୍ଚ ମାନ୍ୟତା ରହିଛି ଏବଂ ସେନା, ସରକାର ଏବଂ ନ୍ୟାୟପାଳିକାର ମୁଖ୍ୟ ନିଯୁକ୍ତ କରନ୍ତି । ଦେଶର ରାଜନୈତିକ, ଧାର୍ମିକ ଏବଂ ସାମରିକ ପ୍ରସଙ୍ଗରେ ସର୍ବୋଚ୍ଚ ନେତାଙ୍କ ନିଷ୍ପତ୍ତି ଚୂଡାନ୍ତ ଅଟେ ।

ସେ କହିଛନ୍ତି ଯେ ମୁଲ୍ଲା ଅଖୁନଜଡା ସରକାରଙ୍କ ନେତା ହେବେ ଏବଂ ଏଥିରେ କୌଣସି ପ୍ରଶ୍ନ ହେବା ଉଚିତ ନୁହେଁ । ରାଷ୍ଟ୍ରପତି ତାଙ୍କ ତତ୍ତ୍ୱାବଧାନରେ କାର୍ଯ୍ୟ କରିବେ ବୋଲି ସେ ସୂଚିତ କରିଛନ୍ତି । ମୁଲ୍ଲା ଅଖୁନଜଡା ତାଲିବାନର ସର୍ବୋଚ୍ଚ ଧାର୍ମିକ ନେତା ଏବଂ ବାଲୁଚିସ୍ତାନ ପ୍ରଦେଶର କାଚଲାକ ଅଞ୍ଚଳରେ ଥିବା ଏକ ମସଜିଦରେ ୧୫ ବର୍ଷ ଧରି କାର୍ଯ୍ୟ କରିଆସୁଛନ୍ତି ।

ସାମଙ୍ଗାନି କହିଛନ୍ତି ଯେ ନୂତନ ସରକାରୀ ଢାଞ୍ଚାରେ ପ୍ରଦେଶଗୁଡ଼ିକ ରାଜ୍ୟପାଳଙ୍କ ଦ୍ୱାରା ପରିଚାଳିତ ହେବ ଏବଂ ଜିଲ୍ଲାପାଳମାନେ ନିଜ ନିଜ ଜିଲ୍ଲା ପାଇଁ ଦାୟୀ ରହିବେ । ତାଲିବାନ ପ୍ରଦେଶ ଏବଂ ଜିଲ୍ଲା ପାଇଁ ରାଜ୍ୟପାଳ, ପୋଲିସ ମୁଖ୍ୟ ଏବଂ ପୋଲିସ କମାଣ୍ଡରଙ୍କୁ ନିଯୁକ୍ତ କରିସାରିଛି । ସେ କହିଛନ୍ତି ଯେ ନୂତନ ଶାସନ, ଜାତୀୟ ପତାକା ଏବଂ ଜାତୀୟ ସଂଗୀତର ନାମ ଏପର୍ଯ୍ୟନ୍ତ ଚୂଡାନ୍ତ ହୋଇନାହିଁ ।