
କିଭ୍: ଋଷ-ୟୁକ୍ରେନ ଯୁଦ୍ଧକୁ ପୁରିଲା ୫୨ ଦିନ । ଥମିବା ପରିବର୍ତ୍ତେ ଦିନକୁଦିନ ଭୟଙ୍କର ହେଉଛି ସ୍ଥିତି । ପୋର୍ଟ ସିଟି ମାରିୟୁପୋଲକୁ ନେଇ ସଂଘର୍ଷ ଜୋର୍ ଧରିଥିବାବେଳେ,ଏହି ସହର କାହା ହାତକୁ ଯିବ ତାହାକୁ ନେଇ ସସପେନ୍ସ ଜାରି ରହିଛି । ତେବେ ଏହାରି ମଧ୍ୟରେ ଋଷ ବାହିନୀକୁ ସହାୟତା କରିବା ଲାଗି ଆଗେଇ ଆସିଛନ୍ତି ଚେଚେନ ବିଦ୍ରୋହୀ । ଯାହାକି ୟୁକ୍ରେନ ପାଇଁ ଚିନ୍ତାର ବିଷୟ ଅଟେ।
ଅନ୍ୟପକ୍ଷରେ ଆମେରିକା ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନଙ୍କ ମତରେ ଚଳିତ ବର୍ଷ ଶେଷ ସମୟ ପର୍ଯ୍ୟନ୍ତ ଯୁଦ୍ଧ ଚାଲିପାରେ । ନିକଟ ଭବିଷ୍ୟତରେ ଯୁଦ୍ଧ ଥମିବାର ସମ୍ଭାବନା ନାହିଁ ବୋଲି ସେ କହିଛନ୍ତି । ଋଷ ଆଣବିକ ଅସ୍ତ୍ର ପ୍ରୟୋଗ କରିବାର ଅଧିକ ସମ୍ଭାବନା ରହିଛି ଏବଂ ଏଥିଲାଗି ବିଶ୍ବ ପ୍ରସ୍ତୁତ ରହିବା ଆବଶ୍ୟକ ବୋଲି କହିଛନ୍ତି ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି । ଋଷ ବାହିନୀ ଆଗରେ ଜୀବନ କିଛି ନୁହେଁ ଏବଂ ସେମାନେ ରାସାୟନିକ ବା ଆଣବିକ ଅସ୍ତ୍ର ବ୍ୟବହାର କରିପାରନ୍ତି ବୋଲି ଆଶଙ୍କା ବ୍ୟକ୍ତ କରିଛନ୍ତି ଜେଲେନସ୍କି । ଆସନ୍ତା ସପ୍ତାହରେ ୟୁକ୍ରେନ ପ୍ରଧାନମନ୍ତ୍ରୀ ଦେନିସ ସିମାଲ, ଅର୍ଥମନ୍ତ୍ରୀ ଓ ମନ୍ତ୍ରାଳୟର ବରିଷ୍ଠ ପ୍ରତିନିଧିମାନେ ଓ୍ବାଶିଂଟନ ଯିବା ନେଇ କୁହାଯାଇଛି । ସେଠାରେ ସେମାନ ଗ୍ରୁପ-୭ ନେତାଙ୍କୁ ଭେଟିବାର କାର୍ଯ୍ୟକ୍ରମ ରହିଛି ।