ରୁଷିଆକୁ ରୋକିବା ପାଇଁ କେବଳ ଦୁଇଟି ବିକଳ୍ପ : ଆମେରିକାର ରାଷ୍ଟ୍ରପତି ଜୋ ବାଇଡେନ୍‌

ଓ୍ବାଶିଂଟନ୍‌: ରୁଷିଆ ଏବଂ ୟୁକ୍ରେନ ମଧ୍ୟରେ ଦିନକୁ ଦିନ ଯୁଦ୍ଧ ସ୍ଥିତି ଅଧିକ ଗମ୍ଭୀର ହେବାରେ ଲାଗିଛି। ୟୁକ୍ରେନ ଭୟଭୀତ ନହୋଇ ଆତ୍ମସମର୍ପଣ କରିବାକୁ ମନା କରିବା ପରେ ରୁଷିଆ ରାଷ୍ଟ୍ରପତି ଭ୍ଲାଦିମିର୍‌ ପୁଟିନ ତାଙ୍କ ସେନାକୁ ଆକ୍ରମଣ ଜୋରଦାର କରିବାକୁ ନିର୍ଦ୍ଦେଶ ଦେଇଛନ୍ତି। ଏହା ପରେ ରୁଷିଆ ସେନା ସବୁ ଦିଗରୁ ୟୁକ୍ରେନକୁ ପ୍ରବେଶ କରିବାକୁ ଚେଷ୍ଟା କରୁଛି, ଫଳରେ ସ୍ଥିତି ଅସମ୍ଭାଳ ହେଇପଡିଛି ।

ୟୁକ୍ରେନର ଏକ ବଡ ସହର ଖାର୍କିଭରେ ଏକ ଗ୍ୟାସ ପାଇପଲାଇନ ବିସ୍ଫୋରଣ ହୋଇଛି। ଏକ ବାଲିଷ୍ଟିକ କ୍ଷେପଣାସ୍ତ୍ର ଦ୍ୱାରା ଏକ ତେଲ ଡିପୋ ଉପରେ ଆକ୍ରମଣ କରାଯାଇଛି। ଏହି ସମୟରେ ଆମେରିକା ପକ୍ଷରୁ ଏକ ବଡ଼ ପ୍ରତିକ୍ରିୟା ଆସିଛି। ଆମେରିକାର ରାଷ୍ଟ୍ରପତି ଜୋ ବାଇଡେନ୍‌ ଏକ ସାକ୍ଷାତକାରରେ କହିଛନ୍ତି, ରୁଷିଆକୁ ରୋକିବା ପାଇଁ କେବଳ ଦୁଇଟି ବିକଳ୍ପ ଅଛି। ପ୍ରଥମଟି ହେଉଛି ରୁଷିଆ ସହିତ ସିଧାସଳଖ ଯୁଦ୍ଧ କରି ତୃତୀୟ ବିଶ୍ୱଯୁଦ୍ଧ ଆରମ୍ଭ କରିବାକିମ୍ବା ଅନ୍ୟ ଏକ ବିକଳ୍ପ ହେଉଛି ସୁନିଶ୍ଚିତ କରିବା ଯେ ଅନ୍ତର୍ଜାତୀୟ ନିୟମକୁ ଉଲ୍ଲଂଘନ କରୁଥିବା କୌଣସି ଦେଶକୁ ଏହାର ମୂଲ୍ୟ ଦେବାକୁ ପଡିବ। ସେ କହିଛନ୍ତି ଯେ, ରୁଷିଆ ଉପରେ ପ୍ରତିବନ୍ଧକ ପାଇଁ ଏକମାତ୍ର ବିକଳ୍ପ ହେଉଛି ତୃତୀୟ ବିଶ୍ୱଯୁଦ୍ଧ। ଯେକୌଣସି ପ୍ରତିବନ୍ଧକ ଲଗାଯାଇଛି, ସେଗୁଡ଼ିକର ବ୍ୟାପକ ପ୍ରଭାବ ପଡ଼ିବ ବୋଲି ସେ କହିଛନ୍ତି।
ସୂଚନାଯୋଗ୍ୟ, ରୁଷିଆ ଉପରେ ବିଭିନ୍ନ ପ୍ରକାର କଟକଣା ଲାଗୁ କରାଯାଇଛି। ଏଥିରେ ଅନେକ ଅର୍ଥନୈତିକ ଏବଂ ବ୍ୟବସାୟିକ ପ୍ରତିବନ୍ଧକ ସାମିଲ ଅଛି।