ଭାରତୀୟ ଅର୍ଥବ୍ୟବସ୍ଥାରେ ଗତ 10 ବର୍ଷରେ ସକରାତ୍ମକ ପରିବର୍ତ୍ତନ ଦେଖାଦେଇଛି- ସୀତାରମଣ

ନୂଆଦିଲ୍ଲୀ,1 ଫେବୃଆରୀ – କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଗୁରୁବାର ସଂସଦର ନିମ୍ନ ସଦନ ଲୋକସଭାରେ ଆର୍ଥିକ ବର୍ଷ 2024-25 ପାଇଁ ଅନ୍ତରିଣ ବଜେଟ୍ ଉପସ୍ଥାପନ କରିଛନ୍ତି । ନିର୍ମଳା ସୀତାରମଣ ଆଜି ନିଜର ଷଷ୍ଠ ଏବଂ ମୋଦି ସରକାରଙ୍କ ଦ୍ୱିତୀୟ କାର୍ଯ୍ୟକାଳରେ ଅନ୍ତିମ ବଜେଟ୍ ଉପସ୍ଥାପନ କରିଛନ୍ତି ।
ସୀତାରମଣ କେନ୍ଦ୍ରୀୟ ଅନ୍ତରିଣ ବଜେଟ 2024-25 ଉପସ୍ଥାପନ କରି କହିଛନ୍ତି ଯେ, ଭାରତୀୟ ଅର୍ଥବ୍ୟବସ୍ଥା ଗତ 10 ବର୍ଷରେ ଗଭୀର ସକରାତ୍ମକ ପରିବର୍ତ୍ତନ ଦେଖାଦେଇଛି । ଭାରତର ଲୋକ ଆଶା ସହିତ ଭବିଷ୍ୟତକୁ ମଧ୍ୟ ଦେଖୁଛନ୍ତି । ଅର୍ଥମନ୍ତ୍ରୀ କହିଛନ୍ତି ଯେ, ଯେତେବେଳେ ଆମ ସରକାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ 2014ରେ କ୍ଷମତା ସମ୍ଭାଳିଥିଲା, ସେତେବେଳେ ଦେଶକୁ ଅନେକ ଚ୍ୟାଲେଞ୍ଜର ସାମ୍ନା କରିବାକୁ ପଡିଥିଲା । ସରକାର ସେହି ଚ୍ୟାଲେଞ୍ଜକୁ ଠିକ୍ ଭାବେ କାବୁ କରିଥିଲେ । ଆମ ସରକାର ସବକା ସାଥ ସବକା ବିକାଶ ଓ ସବକା ପ୍ରୟାସ ମନ୍ତ୍ରରେ ଆଗକୁ ବଢୁଛି ।
ଅର୍ଥମନ୍ତ୍ରୀ ନିଜର ଅନ୍ତରିଣ ବଜେଟ ଭାଷଣରେ କହିଛନ୍ତି ଯେ, ଆମ ସରକାର ନାଗରିକ ପ୍ରଥମ ଓ ସର୍ବନିମ୍ନ ସରକାର ଅଧିକତମ ଶାସନ ଦୃଷ୍ଟିକୋଣ ସହିତ ଉତ୍ତରଦାୟୀ, ଜନକେନ୍ଦ୍ରିତ ଓ ବିଶ୍ୱାସ ଆଧାରିତ ପ୍ରଶାସନ ପ୍ରଦାନ କରିଛି । ସଂସଦରେ ଅନ୍ତରିଣ ବଜେଟ ଉପସ୍ଥାପନ କରି ସୀତାରମଣ କହିଛନ୍ତି ଯେ, ଗତ 10 ବର୍ଷରେ 30କୋଟି ମୁଦ୍ରା ଯୋଜନା ଋଣ ମହିଳା ଉଦ୍ୟମୀଙ୍କୁ ଦିଆଯାଇଛି । ଗ୍ରାମୀଣ କ୍ଷେତ୍ରରେ ପ୍ରଧାନମନ୍ତ୍ରୀ ଆବାସ ଯୋଜନା ଆଧାରରେ ମହିଳାଙ୍କୁ 70 ପ୍ରତିଶତ ଆବାସ ମିଳିଛି ।
ସୀତାରମଣ କହିଛନ୍ତି ଯେ, ଆମକୁ ଗରିବ, ମହିଳା, ଯୁବ, ଅନ୍ନଦାତା ଉପରେ ଧ୍ୟାନ କେନ୍ଦ୍ରିତ କରିବାର ଆବଶ୍ୟକତା ରହିଛି । ସେମାନଙ୍କର ଆବଶ୍ୟକତା ଓ ଆକାଂକ୍ଷା ଆମର ସର୍ବୋଚ୍ଚ ପ୍ରାଥମିକତା ଅଟେ ।
ବଜେଟ୍ ଉପସ୍ଥାପନ କରିବା ପୂର୍ବରୁ ନିର୍ମଳା ସୀତାରମଣ, ରାଷ୍ଟ୍ରମନ୍ତ୍ରୀ ଡକ୍ଟର ଭାଗବତ କିଶନରାଓ, ପଙ୍କଜ ଚୌଧୁରୀ ଓ ଅର୍ଥ ମନ୍ତ୍ରାଳୟର ଅନ୍ୟ ଅଧିକାରୀମାନେ ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ସାକ୍ଷାତ କରିଥିଲେ ।