ଶେଷ ହେଲା ତୋଷାଳି ମେଳା। ରବିବାର ଶେଷ ହୋଇଥିବାରୁ ମେଳାରେ ଲକ୍ଷାଧିକ ଲୋକଙ୍କ ସମାଗମ ହୋଇଥିଲା। ସବୁ ଷ୍ଟଲରେ ଭିଡ଼ ଦେଖିବାକୁ ମିଳିଥିଲା। ଭୁବନେଶ୍ୱର ସହିତ କଟକ , ପୁରୀରୁ ମଧ୍ୟ ଲୋକ ଆସିଥିଲେ। କିଣାକିଣି ସହ ବୁଲାବୁଲି ଓ ଖାଇବାର ମଜା ନେଇଥିଲେ ସମସ୍ତେ। ଖବର ଅନୁଯାୟୀ, ଚଳିତ ବର୍ଷ ଖରା ଦିନରେ ମେଳା ହୋଇଥିଲେ ମଧ୍ୟ ସନ୍ଧ୍ୟା ସମୟରେ ଲୋକଙ୍କ ବେଶ ଭିଡ଼ ଜମୁଥିଲା। ୨ ବର୍ଷ ପରେ ମେଳା ଲାଗିଥିବାରୁ ତୋଷାଳି ମେଳାରେ ଲୋକଙ୍କ ସୁଅ ଛୁଟିଥିଲା। ୧୪ ଦିନ ଧରି ଚାଲିଥିବା ଏହି ମେଳାରେ ପ୍ରାୟ ପ୍ରାୟ ୪୨୦ଟି ଷ୍ଟଲରେ ବିଭିନ୍ନ ହସ୍ତତନ୍ତ ଓ ହସ୍ତଶିଳ୍ପ ସାମଗ୍ରୀ ପ୍ରଦର୍ଶିତ ଓ ବିକ୍ରୟ ହୋଇଛି । ଓଡ଼ିଶା ସମେତ ୨୪ ଟି ରାଜ୍ୟ ଏହି ମେଳାରେ ଯୋଗ ଦେଇଥିଲେ । ତେବେ ଚଳିତ ବର୍ଷ ଏହି ମେଳାରେ ପ୍ରାୟ ୧୬ କୋଟି ଟଙ୍କାରୁ ଉର୍ଦ୍ଧ୍ବ ଟଙ୍କାର କାରବାର ହୋଇଛି । ହସ୍ତଶିଳ୍ପରେ ପ୍ରାୟ ୬ କୋଟ ୧୮ ଲକ୍ଷ, ହସ୍ତତନ୍ତରେ ୭ କୋଟି ୪୭ ଲକ୍ଷ , ଫୁଡ କୋର୍ଟରେ ୨ କୋଟି ୪୭ ଲକ୍ଷ ଟଙ୍କାର କାରବାର ହୋଇଛି ।
ରାଜ୍ୟ ହସ୍ତତନ୍ତ ବୟନ ଓ ହସ୍ତଶିଳ୍ପ ବିଭାଗ ପକ୍ଷରୁ ସୂଚନା ଦିଆଯାଇଛି। ୨୮ ମାର୍ଚ୍ଚରୁ ଏପ୍ରିଲ ୧୦ ପର୍ଯ୍ୟନ୍ତ ଚାଲିଥିବା ଏହି ମେଳାରେ ପାଖାପାଖି ୧୮ଲକ୍ଷ ଲୋକଙ୍କ ସମାଗମ ହୋଇଛି। କୋଭିଡ ଯୋଗୁଁ ୨ ବର୍ଷ ଧରି ତୋଷାଳି ମେଳା ହୋଇନଥିଲା। ଏହି ୧୪ ଦିନରେ ଆଶା ଅନୁଯାୟୀ ବେପାର ହୋଇଥିବା କାରିଗର ଓ ବୁଣାକାର କହିଛନ୍ତି। ଚଳିତ ବର୍ଷ ଡିସେମ୍ବର ମାସରେ ତୋଷାଳି ମେଳା ଆଉ ଥରେ ଆୟୋଜନ କରାଯିବାର ମଧ୍ୟ ଯୋଜନା ରହିଛି। ଏପଟେ ଡିସେମ୍ବରରେ ମଧ୍ୟ ତୋଷାଳି ମେଳା ଆୟୋଜନ କରିବା ପାଇଁ ଜନସାଧାରଣ ଇଚ୍ଛା ପ୍ରକାଶ କରିଛନ୍ତି।
