କରୋନା ପରେ ରାଜଧାନୀରେ ଅଣାୟତ୍ତ ହେଲାଣି ଡେଙ୍ଗୁ

ରାଜଧାନୀ ଭୁବନେଶ୍ୱରରେ ଡେଙ୍ଗୁ ସ୍ଥିତି ଧୀରେ ଧୀରେ ଅଣାୟତ୍ତ ହେବାକୁ ବସିଲାଣି। ଗତ ଜାନୁୁଆରୀରୁ ଜୁଲାଇ ୨୧ ତାରିଖ ପର୍ଯ୍ୟନ୍ତ ସହରରୁ ୨୩୫ଜଣ ଡେଙ୍ଗୁରୋଗୀ ଚିହ୍ନଟ ହୋଇ ସାରିଲେଣି। ଗୋଟିଏ ପଟେ କରୋନା ମହାମାରୀ ପାଇଁ ଲୋକେ ଭୟଭୀତ ଥିବାବେଳେ ଏବେ ଡେଙ୍ଗୁ ରାଜଧାନୀବାସୀଙ୍କ ନିଦ ହଜାଇ ଦେଇଛି। ବିଶେଷକରି ନୀଳାଦ୍ରିବିହାର, କଳ୍ପନା, ଶୈଳଶ୍ରୀ ବିହାର, ଚିନ୍ତାମଣିଶ୍ୱର, ସାଲିଆସାହି ଅଞ୍ଚଳ ହଟ୍‌ସ୍ପଟ୍‌ ଭାବେ ଚିହ୍ନଟ ହେଲାଣି। ସହରରେ ଡେଙ୍ଗୁ କାୟା ବିସ୍ତାର କରିବା ପରେ ଏହାକୁ ଗୁରୁତ୍ୱର ସହ ନେଇଛି ବିଏମ୍‌ସି। ଗୁରୁବାର ଏ ନେଇ ବିଏମ୍‌ସି କମିଶନର ସଞ୍ଜୟ କୁମାର ସିଂ ସହରବାସୀଙ୍କୁ ସତର୍କ କରାଇବା ସହ ନିର୍ଦ୍ଦେଶନାମା ଜାରି କରିଛନ୍ତି। କମିଶନର କହିଛନ୍ତି, ଡେଙ୍ଗୁ ବ୍ୟାପିବା ଆମ ସମସ୍ତଙ୍କ ପାଇଁ ଚିନ୍ତାର ବିଷୟ। ଡେଙ୍ଗୁର ବାହକ ମଶା ସାଧାରଣତଃ ସ୍ଥିର ସଫା ପାଣିରେ ଅଣ୍ଡା ଦେଇ ବଂଶ ବିସ୍ତାର କରିଥାନ୍ତି। ତେଣୁ ସାମୂହିକ ଭାବେ ସମସ୍ତ ନାଗରିକ ନିଜ ନିଜ ସ୍ଥାନରେ ମଶା ଅଣ୍ଡା ଦେବା ଭଳି ପରିବେଶକୁ ନଷ୍ଟ କରିବା, ପାଣିପାତ୍ର ବା ସ୍ଥିର ପାଣି ଇତ୍ୟାଦି ଜମିବାକୁ ନ ଦେବାକୁ କମିଶନର ପରାମର୍ଶ ଦେଇଛନ୍ତି। ବିଏମ୍‌ସି ଏନ୍‌ଫୋର୍ସମେଣ୍ଟ ଦଳ ସହର ବୁଲିବା ସହିତ ପ୍ରତିଷେଧାତ୍ମକ ବ୍ୟବସ୍ଥା କେତେଦୂର ପାଳନ କରାଯାଉଛି ତାହା ତଦାରଖ କରିବେ। କୌଣସି ସଂସ୍ଥା ଏହାର ଉଲ୍ଲଂଘନ କରିଥିବା ଦୃଷ୍ଟିକୁ ଆସିଲେ ଆଇନ୍‌ ଅନୁଯାୟୀ ଜରିମାନା ଏବଂ ଆବଶ୍ୟକ ଦଣ୍ଡ ଲାଗୁ କରାଯିବ ବୋଲି କମିଶନର ସୂଚନା ଦେଇଛନ୍ତି।
ପାଇଁ ବନ୍ଦ ଥିବା ପାର୍କଗୁଡ଼ିକରେ ବିଭିନ୍ନ ପାତ୍ର, ଡଷ୍ଟବିନ୍‌, ଛୋଟ ଖାଲ, ବସିବା ଓ ଖେଳ ସ୍ଥାନରେ ଯେପରି ପାଣି ଜମୁନାହିଁ ତାହା ନିଶ୍ଚିତ କରାଇବା ଆବଶ୍ୟକ। ବିଭିନ୍ନ ଅନୁଷ୍ଠାନ ଓ ସରକାରୀ କାର୍ଯ୍ୟାଳୟ ପ୍ରାଙ୍ଗଣରେ ଯେପରି ପାଣି ଜମି ନ ରହିବ ତାହା ଉପରେ ଦୃଷ୍ଟି ଦେବା ଦରକାର। କାରଖାନା ଓ ଶିଳ୍ପାଞ୍ଚଳରେ ରୋଗର ପ୍ରତିଷେଧକ ବ୍ୟବସ୍ଥା ସ୍ବରୂପ ତଦାରଖ କରି ତୁରନ୍ତ ପଦକ୍ଷେପ ନେବା ଜରୁରୀ। ସେହିଭଳି ଥାନା ଅଞ୍ଚଳରେ ଜବତ ହୋଇ ପଡ଼ିରହିଥିବା ଗାଡ଼ି, ଗ୍ୟାରେଜ, ଟ୍ୟୁବ୍‌ ଓ ଟାୟାର୍‌ ମରାମତି ଇତ୍ୟାଦି ସ୍ଥାନରେ ବର୍ଷାପାଣି ଜମି ରହିଥାଏ। ତେଣୁ ଏହି କ୍ଷେତ୍ରରେ ରୋଗ ପ୍ରତିଷେଧକ ବ୍ୟବସ୍ଥା ଗ୍ରହଣ କରାଯିବା ଆବଶ୍ୟକ। ଆବାସିକ କଲ୍ୟାଣ ସଂଘଗୁଡ଼ିକର କର୍ତ୍ତୃପକ୍ଷ ନିଜ ନିଜ ଆବାସ ପ୍ରାଙ୍ଗଣରେ ପାଣି ଜମା ନ ହେବା ପାଇଁ ନିୟମିତ ପଦକ୍ଷେପ ନେବା ପାଇଁ କମିଶନର ପରାମର୍ଶ ଦେଇଛନ୍ତି।