ଭୋପାଳ, ଶିଶୁ ତସକରିର ଏକ ଚମକପୂର୍ଣ୍ଣ ଘଟଣା ମଧ୍ୟପ୍ରଦେଶର କାଟ୍ନି ଜିଲ୍ଲାରେ ସାମ୍ନାକୁ ଆସିଛି। ବିହାରରୁ ମହାରାଷ୍ଟ୍ରକୁ ନିଆଯାଉଥିବା ୧୬୩ ଜଣ ନାବାଳକଙ୍କୁ ଏକ ଏକ୍ସପ୍ରେସ୍ ଟ୍ରେନ୍ରୁ ରେଲୱେ ପୋଲିସ ଉଦ୍ଧାର କରିଛି। ଉଦ୍ଧାର ହୋଇଥିବା ପିଲାମାନଙ୍କ ବୟସ ୬ରୁ ୧୩ ବର୍ଷ ମଧ୍ୟରେ ଥିବା ଜଣାପଡିଛି।
ରିପୋର୍ଟ ଅନୁଯାୟୀ, ଏହି ନାବାଳକମାନଙ୍କୁ ବିହାରର ଅରାରିଆ ଅଞ୍ଚଳରୁ ମହାରାଷ୍ଟ୍ରର ଲାଟୁରକୁ ଶ୍ରମିକ ଭାବେ କାମ କରାଇବା ପାଇଁ ନିଆଯାଉଥିଲା। ଏନେଇ ଶିଶୁ କଲ୍ୟାଣ କମିଟି ପକ୍ଷରୁ ସୂଚନା ମିଳିବା ପରେ ରେଲୱେ ସୁରକ୍ଷା ବଳ (RPF) ଓ ସରକାରୀ ରେଲୱେ ପୋଲିସ (GRP) ତୁରନ୍ତ କାର୍ଯ୍ୟରତ ହୋଇଥିଲେ।
ପାଟନା-ପୁର୍ନା ଏକ୍ସପ୍ରେସ୍ ଟ୍ରେନ୍ରେ ବିନା ଟିକେଟ ଓ ପ୍ରୟୋଜନୀୟ ଦସ୍ତାବିଜ୍ ବିନା ଯାତ୍ରା କରୁଥିବା ଏହି ପିଲାମାନଙ୍କୁ କାଟ୍ନି ରେଲୱେ ଷ୍ଟେଶନରେ ଅଟକାଇ ଉଦ୍ଧାର କରାଯାଇଥିଲା। ଏହି ଘଟଣାରେ ପିଲାମାନଙ୍କ ସହ ଯାଉଥିବା ୮ ଜଣ ସନ୍ଦିଗ୍ଧ ବ୍ୟକ୍ତିଙ୍କୁ ମଧ୍ୟ ପୋଲିସ ଅଟକ ରଖିଛି।
ଉଦ୍ଧାର ପରେ ସମସ୍ତ ନାବାଳକଙ୍କୁ ଶିଶୁ ସୁରକ୍ଷା ଅଧିକାରୀଙ୍କ ନିକଟକୁ ହସ୍ତାନ୍ତର କରାଯାଇଛି ଏବଂ ସେମାନଙ୍କ ପରିଚୟ ସହ ପରିବାର ସମ୍ପର୍କରେ ତଦନ୍ତ ଆରମ୍ଭ ହୋଇଛି।
ପ୍ରାରମ୍ଭିକ ତଦନ୍ତରୁ ଏହା ଶିଶୁ ତସକରି ମାମଲା ହୋଇପାରେ ବୋଲି ସନ୍ଦେହ କରାଯାଉଛି। ପୋଲିସ ଏହି ଘଟଣାରେ ଅଧିକ ତଦନ୍ତ ଜାରି ରଖିଥିବା ବେଳେ, ଜଡିତ ଲୋକମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ସୂଚନା ମିଳିଛି।
