ଓଡ଼ିଶାରୁ ୭୭ ମଧ୍ୟରୁ ୭୫ ବାଂଲାଦେଶୀ ଅନୁପ୍ରବେଶକାରୀଙ୍କୁ ନିଷ୍କାସନ: ମୁଖ୍ୟମନ୍ତ୍ରୀ
୨୦୨୪ ଜୁନ୍ରୁ ୨୦୨୬ ଫେବୃଆରୀ ପର୍ଯ୍ୟନ୍ତ ଓଡ଼ିଶାରେ ଚିହ୍ନଟ ହୋଇଥିବା ୭୭ ଜଣ ବାଂଲାଦେଶୀ ଅନୁପ୍ରବେଶକାରୀମାନଙ୍କ ମଧ୍ୟରୁ ୭୫ ଜଣଙ୍କୁ ନିଷ୍କାସନ କରାଯାଇଛି ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସୋମବାର ରାଜ୍ୟ ବିଧାନସଭାରେ ସୂଚନା ଦେଇଛନ୍ତି।
ବିଜେଡି ବିଧାୟକ ଗଣେଶ୍ୱର ବେହେରାଙ୍କ ପ୍ରଶ୍ନରେ ଲିଖିତ ଉତ୍ତର ଦେଇ ମୁଖ୍ୟମନ୍ତ୍ରୀ କହିଥିଲେ ଯେ, କେନ୍ଦ୍ର ଗୃହ ମନ୍ତ୍ରାଳୟଙ୍କ ନିର୍ଦ୍ଦେଶ ଅନୁଯାୟୀ ଏହି ନିଷ୍କାସନ ପ୍ରକ୍ରିୟା କରାଯାଇଛି।
ମୁଖ୍ୟମନ୍ତ୍ରୀଙ୍କ କହିବା ଅନୁଯାୟୀ, ୨୦୨୫ ମେ ୨ ତାରିଖରେ ଗୃହ ମନ୍ତ୍ରାଳୟ ପକ୍ଷରୁ ନିର୍ଦ୍ଦେଶ ଜାରି ହେବା ପରେ ସମସ୍ତ ଜିଲ୍ଲାରେ ବିଶେଷ ଟାସ୍କ ଫୋର୍ସ ଗଠନ କରାଯାଇଥିଲା। ଏହି ଟିମ୍ଗୁଡ଼ିକୁ ଅବୈଧ ଅନୁପ୍ରବେଶକାରୀଙ୍କ ଚିହ୍ନଟ, ଗିରଫ ଓ ନିଷ୍କାସନ କାମରେ ନିୟୋଜିତ କରାଯାଇଥିଲା।
ସେହିପରି ସମସ୍ତ ଜିଲ୍ଲା ପୁଲିସ ଅଧିକ୍ଷକମାନଙ୍କୁ ନିଜ ଅଞ୍ଚଳରେ ରହୁଥିବା ଅନୁପ୍ରବେଶକାରୀମାନଙ୍କୁ ଶୀଘ୍ର ଚିହ୍ନଟ କରିବା ପାଇଁ ନିର୍ଦ୍ଦେଶ ଦିଆଯାଇଥିଲା।
ଜିଲ୍ଲା ଭିତ୍ତିକ ତଥ୍ୟ ଅନୁଯାୟୀ, ସବୁଠାରୁ ଅଧିକ ନିଷ୍କାସନ ଭୁବନେଶ୍ୱରରୁ ୨୬ ଜଣ ହୋଇଥିବାବେଳେ, ଜଗତସିଂହପୁରରୁ ୨୧, କଟକରୁ ୧୫, ବ୍ରହ୍ମପୁର ପୁଲିସ ଜିଲ୍ଲାରୁ ୬ ଓ କନ୍ଧମାଳରୁ ୩ ଜଣଙ୍କୁ ନିଷ୍କାସନ କରାଯାଇଛି।
