‘ରେଡ୍ ହାର୍ଟ’ ଇମୋଜି ପଠାଉଥିଲେ ହୋଇଯାଆନ୍ତୁ ସାବଧାନ !

ଶବ୍ଦ ବଦଳରେ ଇମୋଜି ଜରିଆରେ ଭାବନାର ପରିପ୍ରକାଶ କରିବା ଏବେ ପୁରୁଣା ହୋଇଗଲାଣି । କିନ୍ତୁ ଏହାସହ ଜଡିତ ଆଇନ ମଧ୍ୟ ସେତିକି ସୁଦୃଢ ହେବାରେ ଲାଗିଛି । ପର୍ବ ପର୍ବାଣୀ ହେଉ କି ନିତିଦିନିଆ ହ୍ବାଟସଆପ୍ ରେ ଇମୋଜି ପଠାଇବା ସାଧାରଣ କଥା ହୋଇଗଲାଣି । ନିକଟରେ ଭାଲେଣ୍ଟାଇନ୍ ଡେ ଅବସରରେ ନିଜ ପାର୍ଟନର କିମ୍ବା ବନ୍ଧୁଙ୍କୁ ରେଡ୍ ହାର୍ଟ ଇମୋଜି ପଠାଇଥିଲେ ନିଶ୍ଚୟ । ଫେସବୁକ୍ ରେ କାହା ପୋଷ୍ଟର ଜବାବରେ ଏକ ରେଡ୍ ହାର୍ଟ ପ୍ରେସ୍ କରିଥିବେ ନିଶ୍ଚୟ । କିନ୍ତୁ ଯଦି ଆପଣ ପଶ୍ଚିମ ଦେଶ ବ୍ୟତୀତ ସାଉଦି ଆରବରେ ଅଛନ୍ତି, ତେବେ ଏହି ରେଡ୍ ହାର୍ଟ ଇମୋଜି କାହାକୁ ପଠାଇପାରିବେନି । ଯଦି ପଠାଇବେ ତେବେ ଆପଣଙ୍କ ପାଇଁ ତାହା ସମସ୍ୟା ସୃଷ୍ଟି କରିପାରେ । ପ୍ରକୃତରେ ସାଉଦି ଆରବରେ ସାଇବର ଆଇନ ବହୁତ କଡାକଡି । ଏହି ଦେଶରେ ଯଦି ଆପଣ ପରିବାରଲୋକ କିମ୍ବା ବନ୍ଧୁଙ୍କୁ ରେଡ୍ ହାର୍ଟ ଇମୋଜି ପଠାଉଛନ୍ତି ତେବେ ଆପଣଙ୍କୁ ଜେଲ୍ ହୋଇପାରେ । ଏହାସହ ୨୦ଲକ୍ଷ ଟଙ୍କା ଜରିମନା ଦେବାକୁ ପଡିପାରେ । ବିଶେଷ ପରିସ୍ଥିତିରେ ଦୁଇ ବର୍ଷ ଜେଲଦଣ୍ଡ ସହ ୨୦ ଲକ୍ଷ ଟଙ୍କା ଜରିମନା ଲଗାଯାଇପାରେ ।

ସାଉଦିର ସାଇବର ଏକ୍ସପର୍ଟଙ୍କ ଅନୁସାରେ, ସାଉଦି ଆଇନ ଅନୁଯାୟୀ ଯଦି ରେଡ୍ ହାର୍ଟ ଇମୋଜି ପଠାଉଥିବା ବ୍ୟକ୍ତି ଦୋଷୀ ସାବ୍ୟସ୍ତ ହୁଏନ୍ତି ତେବେ ତାଙ୍କୁ ୨ରୁ ୫ ବର୍ଷ ଜେଲ୍ ଦଣ୍ଡ ହୋଇପାରେ । ଏହା ବ୍ୟତୀତ ଇମୋଜି ପଠାଉଥିବା ବ୍ୟକ୍ତିଙ୍କ ଉପରେ ଏକ ଲକ୍ଷ ସାଉଦି ରିୟାଲ ଜରିମନା ମଧ୍ୟ ଲଗାଯାଇପାରେ । ସାଉଦିରେ ରେଡ୍ ହାର୍ଟ ଇମୋଜି ପଠାଇବାକୁ ଉତ୍ପୀଡନ ଆଇନ ଶ୍ରେଣୀରେ ରଖାଯାଇଛି । ନ୍ୟୁଜ୍ ୱେବସାଇଟ୍ ଗଲ୍ଫ୍ ନ୍ୟୁଜ୍ ଡଟ୍ କମ୍ ରେ ପ୍ରକାଶିତ ଖବର ଅନୁଯାୟୀ, ସାଉଦି ଆରବରେ ଆଣ୍ଟି-ଫ୍ରଡ୍ ଆସୋସିଏସନର ସଦସ୍ୟ ଅଲ ମୋଆତାଜ୍ କୁତବି କହିଛନ୍ତି ଯେ, ହ୍ବାଟସ୍ ଆପ୍ ରେ ରେଡ୍ ହାର୍ଟ ଇମୋଜି ପଠାଇବା ଏକ ଉତ୍ପୀଡନ ଅପରାଧ । ସେ କହିଛନ୍ତି ଯେ, ଯଦି ଅନଲାଇନ୍ ଚାଟିଂ ସମୟରେ କୌଣସି ଫଟୋ କିମ୍ବା ଇମୋଜିକୁ ନେଇ କେହି ମାମଲା ରୁଜୁ କରନ୍ତି, ତେବେ ଏହା ଉତ୍ପୀଡନ ଅପରାଧ ଶ୍ରେଣୀରେ ଆସିବ। ସାଉଦି ଆରବରେ ଏଭଳି ଅପରାଧ ପାଇଁ ଜିରୋ ଟଲେରନ୍ସ ନୀତି ରହିଛି।