ସୁବର୍ଣ୍ଣପୁର ଜିଲ୍ଲାରେ କୋଭିଡ୍ ନିୟମ ପାଳନ ହୋଇ ୮ତାରିଖରୁ ଖୋଲିବ ମନ୍ଦିର

ଜିଲ୍ଲାରେ କୋଭିଡ୍ ସଂକ୍ରମଣ ହ୍ରାସ ପାଇବା ଦୃଷ୍ଟି‌ରେ ଦେଖି ଜନସାଧାରଣ ବିଭିନ୍ନ କାର୍ଯ୍ୟକ୍ରମ କଣ୍ଟେନ୍‌ମେଣ୍ଟ୍‌ ଜୋନ୍‌ ବାହାରେ କରିବାକୁ ଦାବି କରୁଥିଲେ। ସ୍ବତନ୍ତ୍ର ରିଲିଫ୍‌ କମିସନର ତଥା ଅତିରିକ୍ତ ମୁଖ୍ୟ ଶାସନ ସଚିବଙ୍କ ଆଦେଶନାମା ସଂଖ୍ୟା ୭୩୮୪/ଆର ଆଣ୍ଡ୍‌ ଡିଏମ୍‌ ତା ୩୦/୧୨/୨୦୨୦ ଅନୁଯାଇ ସୁବର୍ଣ୍ଣପୁର ଜିଲ୍ଲାରେ ଆସନ୍ତା ୮ ତାରିଖରୁ କୋଭିଡ୍ ନିୟମ ପାଳନ କରାଯାଇ ଧାର୍ମିକ ଅନୁଷ୍ଠାନ, ମନ୍ଦିର, କ୍ରୀଡ଼ା କାର୍ଯ୍ୟକ୍ରମ, ସାଂସ୍କୃତିକ କାର୍ଯ୍ୟକ୍ରମ ଖୋଲିବାକୁ ଜିଲ୍ଲାପାଳ ମୋନୀଷା ବାନାର୍ଜୀ ଜିଲ୍ଲା କାର୍ଯ୍ୟାଳୟ ଜରୁରୀକାଳୀନ ବିଭାଗ ପତ୍ର ସଂଖ୍ୟା ୭୪ ତା ୪/୧/୨୦୨୧ ଅନୁଯାୟୀ ଆଦେଶନାମା ଜାରି କରିଛନ୍ତି।ଏହି କାର୍ଯ୍ୟକ୍ରମ ମାନଙ୍କରେ ଶହେ ଲୋକ ଏକତ୍ରିତ ହୋଇପାରିବେ।

ଧାର୍ମିକ ଅନୁଷ୍ଠାନ ଖୋଲିବା ପୂର୍ବରୁ ପ୍ରମୁଖ ଧାର୍ମିକ ଅନୁଷ୍ଠାନ ଏବଂ ପୂଜା ସ୍ଥାନରେ ଲୋକଙ୍କ ପ୍ରବେଶକୁ ନେଇ ଦେବୋତ୍ତର ବିଭାଗର କାର୍ଯ୍ୟନିର୍ବାହୀ ଅଧିକାରୀ, ସ୍ଥାନୀୟ ତହସିଲ୍‌ଦାର, ସ୍ଥାନୀୟ ଆଇଆଇସି, ପଞ୍ଚାୟତିରାଜ ପ୍ରତିନିଧି, ମନ୍ଦିର ପରିଚାଳନା କମିଟି ସଦସ୍ୟ, ଧାର୍ମିକ ଅନୁଷ୍ଠାନ ପରିଚାଳନା କମିଟି ସଦସ୍ୟ, ମନ୍ଦିର ଟ୍ରଷ୍ଟି ମାନଙ୍କୁ ନେଇ ଏକ ବୈଠକ ହେବ। ଏଥିରେ କୋଭିଡ୍ ନିୟମାବଳୀକୁ ସୁନିଶ୍ଚିତ କରିବାକୁ ହେବ। ଗ୍ରାମାଞ୍ଚଳରେ ଥିବା ମନ୍ଦିର ମାନଙ୍କରେ କିଭଳି ଏସ୍‌ଓପି ପାଳନ ହେବ ରାଜସ୍ବ ନିରୀକ୍ଷକ ସେଥିପାଇଁ ଗ୍ରାମ୍ୟ ମୁଖିଆ, ସେବାୟତଙ୍କ ସହ ଆଲୋଚନା କରିବେ। ସପ୍ତାହରେ କେବଳ ରବିବାର ମନ୍ଦିର, ମସଜିଦ୍‌ ଏବଂ ଅନ୍ୟାନ୍ୟ ଧାର୍ମିକ ଅନୁଷ୍ଠାନ ବନ୍ଦ ରହିବ ଏବଂ ଚର୍ଚ୍ଚ ଶନିବାର ଦିନ ବନ୍ଦ ରହିବ। ମାସ୍କ୍‌ ପରିଧାନ ଏବଂ ସାମାଜିକ ଦୂରତା ପାଳନ କରିବାକୁ ଗୁରୁତ୍ବ ଦିଆଯିବା ସହ ଅନ୍ୟାନ୍ୟ କୋଭିଡ୍ ନିୟମା‌ବଳୀ ପାଳନ କରିବାକୁ ଆଦେଶନାମା ଜାରି କରାଯାଇଛି। କୋଭିଡ୍ ଏସ୍‌ଓପି ପାଳନ ଉଲ୍ଲଂଘନ କରୁଥିବା ଅନୁଷ୍ଠାନକୁ କୋଭିଡ୍ ସଂକ୍ରମଣ ଦୂରହେବା ପର୍ଯ୍ୟନ୍ତ ବନ୍ଦ କରାଯିବ ବୋଲି ଆଦେଶନାମାରେ ଦର୍ଶାଯାଇଛି।