ଭାରତର ସାମାଜିକ ଭିତ୍ତିଭୂମିକୁ ସୁଦୃଢ଼ କରିବା ପାଇଁ ଆଦାନୀ ଗ୍ରୁପ୍ ବଡ଼ ପଦକ୍ଷେପ ନେଇଛି। ସାରା ଦେଶରେ ୩୦୦ଟି ସ୍କୁଲ ଏବଂ ୩୦ଟି ଆଧୁନିକ ହସ୍ପିଟାଲ ନିର୍ମାଣ ପାଇଁ ପ୍ରାୟ ୬୦,୦୦୦ କୋଟି ଟଙ୍କାର ସାମାଜିକ ନିବେଶ କରିବାକୁ ଗୋଷ୍ଠୀ ଯୋଜନା କରିଛି।
ନୂଆଦିଲ୍ଲୀରେ ଆୟୋଜିତ ଏକ ନେତୃତ୍ୱ ସମ୍ମିଳନୀରେ ଭାଷଣ ଦେଇ ଆଦାନୀ ପୋର୍ଟସ୍ ଏବଂ ସ୍ପେଶାଲ୍ ଇକୋନୋମିକ୍ ଜୋନ୍ର ପରିଚାଳନା ନିର୍ଦ୍ଦେଶକ ଏବଂ ଆଦାନୀ ସିମେଣ୍ଟର ନିର୍ଦ୍ଦେଶକ କରଣ ଆଦାନୀ ଏହି ସୂଚନା ଦେଇଛନ୍ତି। ସେ କହିଛନ୍ତି ଯେ ଆର୍ଥିକ ଅଭିବୃଦ୍ଧି ସହ ସାମାଜିକ ପ୍ରତିଷ୍ଠାନଗୁଡ଼ିକୁ ମଜବୁତ କରିବା ଦେଶର ସମଗ୍ର ବିକାଶ ପାଇଁ ଆବଶ୍ୟକ।
ଏହି ବୃହତ୍ ସାମାଜିକ ନିବେଶ ଯୋଜନା ପ୍ରଥମେ ଆଦାନୀ ଗ୍ରୁପ୍ ଅଧ୍ୟକ୍ଷ ଗୌତମ ଆଦାନୀ ୨୦୨୨ ମସିହାରେ ତାଙ୍କ ୬୦ତମ ଜନ୍ମଦିନରେ ଘୋଷଣା କରିଥିବା ଦାନଶୀଳ ପ୍ରତିଶ୍ରୁତିର ଅଂଶ ଭାବରେ ଆସିଥିଲା। ଆଗାମୀ ଦଶ ବର୍ଷ ମଧ୍ୟରେ ପର୍ଯ୍ୟାୟକ୍ରମେ ଏହି ସ୍କୁଲ ଓ ହସ୍ପିଟାଲଗୁଡ଼ିକୁ ନିର୍ମାଣ କରାଯିବ।
କରଣ ଆଦାନୀଙ୍କ କହିବା ଅନୁସାରେ, ପ୍ରସ୍ତାବିତ ସ୍କୁଲଗୁଡ଼ିକ ଗୁଣାତ୍ମକ ଶିକ୍ଷାର ପହଞ୍ଚ ବଢ଼ାଇବା ସହ ବିଭିନ୍ନ ସମୁଦାୟର ପ୍ରତିଭାକୁ ଉନ୍ନତ କରିବାରେ ସହାୟକ ହେବ। ଅନ୍ୟପଟେ, ହସ୍ପିଟାଲଗୁଡ଼ିକ ଦେଶର ବିଭିନ୍ନ ଅଞ୍ଚଳରେ ଉନ୍ନତ ସ୍ୱାସ୍ଥ୍ୟସେବା ଉପଲବ୍ଧତାକୁ ବୃଦ୍ଧି କରିବ।
ସେ କହିଛନ୍ତି ଯେ ଏହି ପଦକ୍ଷେପ ଆଦାନୀ ଗ୍ରୁପ୍ର ସାମାଜିକ ବିକାଶ ଶାଖା ଆଦାନୀ ଫାଉଣ୍ଡେସନର ଦୀର୍ଘକାଳୀନ କାର୍ଯ୍ୟର ଅଂଶ। ଏହି ଫାଉଣ୍ଡେସନ ଏବେ ଶିକ୍ଷା, ସ୍ୱାସ୍ଥ୍ୟ, ଗ୍ରାମୀଣ ବିକାଶ ଓ ସ୍ଥାୟୀ ଜୀବିକା ଉପରେ କାମ କରୁଛି ଏବଂ ଚଳିତ ବର୍ଷ ଏହା ୩୦ ବର୍ଷ ପୂରଣ କରିବ।
