ଭୁବନେଶ୍ୱର: ଚିନି ଦର ବୃଦ୍ଧି ମଧ୍ୟରେ ଏବେ ଗୁଡ଼ ଦାମ ମଧ୍ୟ ଖାଉଟିଙ୍କ ଚିନ୍ତା ବଢ଼ାଇଛି। କିଛିଦିନ ମଧ୍ୟରେ ଗୁଡ଼ର ଦରରେ ବଡ଼ ପରିବର୍ତ୍ତନ ହୋଇଛି। ପୂର୍ବରୁ କିଲୋ ପିଛା ୪୦ରୁ ୫୦ ଟଙ୍କାରେ ମିଳୁଥିବା ଗୁଡ଼ ଏବେ ୮୦ରୁ ୯୦ ଟଙ୍କା ପର୍ଯ୍ୟନ୍ତ ବିକ୍ରି ହେଉଛି। ଫଳରେ ଗୁଡ଼ର ଦର ପ୍ରାୟ ଦୁଇଗୁଣା ବଢ଼ିଛି।
ଚିନି ମହଙ୍ଗା ହେବା ପରେ ଅନେକ ଲୋକ ବିକଳ୍ପ ଭାବେ ଗୁଡ଼ ବ୍ୟବହାର କରୁଥିବାରୁ ଏହାର ଚାହିଦା ବଢ଼ିଛି। ଚାହିଦା ବୃଦ୍ଧି ସହିତ ଯୋଗାଣ ପ୍ରଭାବିତ ହେବାରୁ ବଜାର ଦର ଉପରେ ଏହାର ପ୍ରଭାବ ପଡ଼ିଛି।
ଗୁଡ଼ ଉତ୍ପାଦନରେ ଭାରତ ବିଶ୍ୱର ଏକ ପ୍ରମୁଖ ଦେଶ। ଦେଶରେ ଉତ୍ପାଦିତ ଆଖୁର ଏକ ବଡ଼ ଅଂଶ ଗୁଡ଼ ପ୍ରସ୍ତୁତିରେ ବ୍ୟବହାର ହୋଇଥାଏ। ତେଣୁ ଦେଶୀ ବଜାରରେ ଆଖୁର ଉପଲବ୍ଧତା ଓ ଦର ଗୁଡ଼ର ମୂଲ୍ୟକୁ ପ୍ରଭାବିତ କରିଥାଏ।
ଅନ୍ୟପଟେ ଏଥାନଲ ଉତ୍ପାଦନ ବୃଦ୍ଧି ମଧ୍ୟ ଆଖୁ ଓ ଏହାର ଉପଉତ୍ପାଦର ବ୍ୟବହାର ଉପରେ ପ୍ରଭାବ ପକାଉଛି। ଫଳରେ ଚିନି ଓ ଗୁଡ଼ ଉତ୍ପାଦନ ପାଇଁ ଆଖୁର ଉପଲବ୍ଧତା ନେଇ ବଜାରରେ ଚାପ ସୃଷ୍ଟି ହେଉଛି। ଚିନି ପରେ ଗୁଡ଼ ଦର ବୃଦ୍ଧି ଖାଉଟିଙ୍କ ଘରୋଇ ବଜେଟ୍ ଉପରେ ଅତିରିକ୍ତ ଚାପ ପକାଇଛି।
