ସରଣ୍ଡା ଜଙ୍ଗଲରେ ପୁଣି ବିସ୍ଫୋରଣ, କୋବ୍ରା ଯବାନ ଆହତ

ସରଣ୍ଡା ଜଙ୍ଗଲରେ ସୋମବାର ପୁଣି ଏକ ବିସ୍ଫୋରଣ ଘଟିଥିବା ଖବର ସାମ୍ନାକୁ ଆସିଛି, ଯାହା ଅଞ୍ଚଳର ସୁରକ୍ଷା ବ୍ୟବସ୍ଥା ଓ ନକ୍ସଲ କାର୍ଯ୍ୟକଳାପକୁ ନେଇ ନୂଆ ପ୍ରଶ୍ନ ଉଠାଇଛି।

୬ ଏପ୍ରିଲ ସକାଳେ ବାଲିବା ଗାଁ ନିକଟ ଚଡ୍ରା ଡେରା ଜଙ୍ଗଲରେ ଏକ ଲ୍ୟାଣ୍ଡମାଇନ୍ ବିସ୍ଫୋରଣ ଘଟିଥିଲା। ଏହି ଘଟଣାରେ କୋବ୍ରା ୨୦୫ ବାଟାଲିୟନର ଯବାନ ଅନୁଜ କୁମାର ଆହତ ହୋଇଛନ୍ତି। ଘଟଣା ପରେ ସମଗ୍ର ଅଞ୍ଚଳରେ ଆତଙ୍କର ପରିସ୍ଥିତି ସୃଷ୍ଟି ହୋଇଛି। ଆହତ ଯବାନଙ୍କୁ ତୁରନ୍ତ ପ୍ରାଥମିକ ଚିକିତ୍ସା ଦିଆଯାଇ ପରେ ଉତ୍ତମ ଚିକିତ୍ସା ପାଇଁ ରାଞ୍ଚିକୁ ପଠାଯାଇଛି। ତାଙ୍କ ଅବସ୍ଥା ସ୍ଥିର ଥିବା ସୂଚନା ମିଳିଛି।

ଘଟଣା ପରେ ସୁରକ୍ଷା ବଳ ପକ୍ଷରୁ ସର୍ଚ୍ଚ ଅପରେସନକୁ ତୀବ୍ର କରାଯାଇଛି ଏବଂ ଅଞ୍ଚଳକୁ ଘେରାଉ କରି ଯାଞ୍ଚ ଚାଲିଛି। ସରଣ୍ଡା ଅଞ୍ଚଳ ଦେଶର ସବୁଠୁ ସମ୍ବେଦନଶୀଳ ନକ୍ସଲ ପ୍ରଭାବିତ ଅଞ୍ଚଳମାନଙ୍କ ମଧ୍ୟରୁ ଗୋଟିଏ ଭାବେ ପରିଚିତ। ଘନ ଜଙ୍ଗଲ ଓ ଦୁର୍ଗମ ଭୌଗୋଳିକ ପରିସ୍ଥିତି ମାଓବାଦୀମାନଙ୍କ ପାଇଁ ଲୁଚିବାର ସୁବିଧା ଦେଇଥାଏ।

ଏହି ଘଟଣା ପରେ ଅନେକ ପ୍ରଶ୍ନ ଉଠୁଛି, ଅଞ୍ଚଳରେ ପୁଣି ନକ୍ସଲ କାର୍ଯ୍ୟକଳାପ ବଢ଼ୁଛି କି? । ପୂର୍ବରୁ ପ୍ଲାଣ୍ଟ କରାଯାଇଥିବା IED ଏବେ ମଧ୍ୟ ଘାତକ ହୋଇ ରହିଛି କି? । ସର୍ଚ୍ଚ ଅପରେସନ ସମୟରେ ସୁରକ୍ଷାରେ କୌଣସି ତ୍ରୁଟି ଥିଲା କି? ।

ଉଲ୍ଲେଖଯୋଗ୍ୟ, କେନ୍ଦ୍ର ଗୃହ ମନ୍ତ୍ରଣାଳୟ ୨୦୨୬ ମାର୍ଚ୍ଚ ୩୧ ପର୍ଯ୍ୟନ୍ତ ଦେଶକୁ ନକ୍ସଲମୁକ୍ତ କରିବାକୁ ଲକ୍ଷ୍ୟ ଧାର୍ଯ୍ୟ କରିଥିଲେ। କିନ୍ତୁ ଏପରି ଘଟଣା ମାଓବାଦୀମାନଙ୍କ ଚ୍ୟାଲେଞ୍ଜକୁ ସ୍ପଷ୍ଟ କରୁଛି। ସୁରକ୍ଷା ବ୍ୟବସ୍ଥାକୁ ଆହୁରି ମଜବୁତ କରିବା ସହିତ ଗୁପ୍ତଚର ବ୍ୟବସ୍ଥାକୁ ସକ୍ରିୟ କରିବା ଆବଶ୍ୟକ ବୋଲି ବିଶେଷଜ୍ଞମାନେ ମତ ପ୍ରକାଶ କରୁଛନ୍ତି।