ଉତ୍ତର ପ୍ରଦେଶ : ଉତ୍ତର ପ୍ରଦେଶର ହାମିରପୁର ଜିଲ୍ଲାରେ ଯମୁନା ନଦୀରେ ଏକ ହୃଦୟବିଦାରକ ଅଘଟଣ ଘଟିଛି। ବୁଧବାର ବିଳମ୍ବିତ ରାତିରେ ୯ ଜଣଙ୍କୁ ନେଇ ଯାଉଥିବା ଗୋଟିଏ ଡଙ୍ଗା ପ୍ରବଳ ବର୍ଷା ଯୋଗୁ ନଦୀ ମଝିରେ ବୁଡ଼ି ଯାଇଥିଲା। ଏହି ଦୁର୍ଘଟଣାରେ ଜଣେ ମହିଳା ଓ ୨ ଜଣ ଝିଅଙ୍କ ମୃତ୍ୟୁ ଘଟିଥିବା ବେଳେ ୩ ଜଣ ଛୋଟ ପିଲା ଏବେ ମଧ୍ୟ ନିଖୋଜ ଅଛନ୍ତି। ଉଦ୍ଧାରକାରୀ ଦଳ ସେମାନଙ୍କୁ ଖୋଜିବାକୁ ଚେଷ୍ଟା ଜାରି ରଖିଛି।
ସୂଚନା ଅନୁଯାୟୀ, ଡଙ୍ଗାରେ ଥିବା ଲୋକମାନେ ଦେଶରାଜ ନିଶାଦଙ୍କ ଘରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେଇଥିଲେ। କାର୍ଯ୍ୟକ୍ରମ ପରେ ସେମାନେ ଯମୁନା ନଦୀର ଆରପଟକୁ ଯାଇ ତରଭୁଜ, କାକୁଡ଼ି ଓ ଅନ୍ୟାନ୍ୟ ଫଳ ଆଣିବାକୁ ଡଙ୍ଗାରେ ଯାତ୍ରା କରିଥିଲେ। ବିଷ୍ଣୁ ନିଶାଦ, ତାଙ୍କ ପତ୍ନୀ ଓ ପରିବାରର ୭ ଜଣ ପିଲା ଏହି ଡଙ୍ଗାରେ ଥିଲେ।
ଫେରୁଥିବା ବେଳେ ହଠାତ୍ ପ୍ରବଳ ବର୍ଷା ଆରମ୍ଭ ହୋଇଥିଲା। ବର୍ଷା ଓ ବେଗବାନ ପବନ ଯୋଗୁ ଡଙ୍ଗାଟି ନିୟନ୍ତ୍ରଣ ହରାଇ ନଦୀ ମଝିରେ ଓଲଟି ପଡ଼ିଥିଲା। ଫଳରେ ସମସ୍ତ ୯ ଜଣ ପାଣିରେ ବୁଡ଼ି ଯାଇଥିଲେ। ତେବେ ବିଷ୍ଣୁ ନିଶାଦ ଓ ଜଣେ ଛୋଟ ପିଲା ପହଁରା ଜାଣିଥିବାରୁ ସୁରକ୍ଷିତ ଭାବେ କୂଳକୁ ଫେରି ଆସିଥିଲେ। ସ୍ଥାନୀୟ ମତ୍ସ୍ୟଜୀବୀମାନେ ଆଉ ଜଣେ ପିଲାଙ୍କୁ ଉଦ୍ଧାର କରିଥିଲେ।
ଘଟଣା ସମ୍ପର୍କରେ ଖବର ପାଇ ପୁଲିସ୍, ପ୍ରଶାସନ ଓ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚିଥିଲେ। ଉଦ୍ଧାର କାର୍ଯ୍ୟ ଚାଲିଥିବା ବେଳେ ନିଶାଦଙ୍କ ପତ୍ନୀ ଓ ୨ ଜଣ ପିଲାଙ୍କ ମୃତଦେହ ନଦୀରୁ ଉଦ୍ଧାର କରାଯାଇଛି। ଏବେ ମଧ୍ୟ ନିଖୋଜ ଥିବା ୩ ଜଣ ଶିଶୁଙ୍କୁ ଖୋଜିବା ପାଇଁ ଅଭିଯାନ ଜାରି ରହିଛି।
