ଭୁବନେଶ୍ୱର- ଆଜି ହେଉଛି ଭଗବାନ ବିର୍ସାମୁଣ୍ଡାଙ୍କ ଜୟନ୍ତୀ ତଥା ଜନଜାତି ଗୌରବ ଦିବସ । ଏହି ଅବସରରେ ଭଗବାନ ବିର୍ସାମୁଣ୍ଡାଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି ରାଜ୍ୟପାଳ ରଘୁବର ଦାସ । ସୋସିଆଲ ମିଡିଆ ଏକ୍ସରେ ସେ କହିଛନ୍ତି ଯେ, ଗୁଲାମୀ ବିରୁଦ୍ଧରେ ସ୍ୱର ଉଠାଇ ବ୍ରିଟିଶ ଶାସନର ମୂଳଦୁଆକୁ ଦୋହଲାଇ ଦେଇଥିବା ଅମର ସହିଦ ଧରିତ୍ରୀ ଆବା ଭଗବାନ ବିର୍ସା ମୁଣ୍ଡାଙ୍କୁ ତାଙ୍କ ଜୟନ୍ତୀ ଅବସରରେ କୋଟି କୋଟି ପ୍ରଣାମ । ଭଗବାନ ବିର୍ସା ମୁଣ୍ଡା ଧର୍ମ ଓ ଆଦି ସଂସ୍କୃତିର ରକ୍ଷା କରିବା ପାଇଁ ଆହ୍ୱାନ ଦେଇଥିଲେ । ଅନ୍ୟାୟ ବିରୁଦ୍ଧରେ ତାଙ୍କର ସଂଘର୍ଷ ଆଗାମୀ ପିଢିକୁ ପ୍ରେରଣା ଦେଉଥିବ । ଏହାସହିତ ଜନଜାତି ଗୌରବ ଦିବସର ମଧ୍ୟ ହାର୍ଦ୍ଦିକ ଶୁଭେଚ୍ଛା ଜଣାଇଛନ୍ତି ରାଜ୍ୟପାଳ ।
ଏହି ଅବସରରେ ରାଜ୍ୟପାଳ ଓଡ଼ିଶା ରାଜଭବନ ପରିସରରେ ଥିବା ଭଗବାନ ବିର୍ସା ମୁଣ୍ଡାଙ୍କ ଫଟୋ ଚିତ୍ରର ପୁଷ୍ପମାଲ୍ୟ ଅର୍ପଣ କରିଛନ୍ତି ।
