ମଧ୍ୟପ୍ରାଚ୍ୟରେ ଚାଲିଥିବା ସଂଘର୍ଷ ମଧ୍ୟରେ ଭାରତ ତାହାର ପ୍ରତିରକ୍ଷା କ୍ଷମତାକୁ ଆହୁରି ସୁଦୃଢ଼ କରିବା ପାଇଁ ରୁଷିଆ ସହ ଏକ ଗୁରୁତ୍ୱପୂର୍ଣ୍ଣ ଚୁକ୍ତି କରିଛି। ଏହି ଚୁକ୍ତି ଅନୁସାରେ ‘ଟୁଙ୍ଗୁସ୍କା’ ଆଣ୍ଟି-ଏୟାରକ୍ରାଫ୍ଟ ଓ ମିସାଇଲ୍ ସିଷ୍ଟମ କ୍ରୟ କରାଯିବ।
ସୂଚନା ଅନୁଯାୟୀ, ଭାରତ ରୁଷିଆର ରୋସୋବୋରୋନେକ୍ସପୋର୍ଟ ସହ ପ୍ରାୟ ୪୪୫ କୋଟି ଟଙ୍କାର ଏହି ଚୁକ୍ତିକୁ ଅନୁମୋଦନ କରିଛି। ଏହା ଭାରତୀୟ ସ୍ଥଳସେନାକୁ ଯୁଦ୍ଧକ୍ଷେତ୍ରରେ ଟ୍ୟାଙ୍କ ଓ ଯାନବାହନକୁ ବାୟୁ ପ୍ରତିରକ୍ଷା ସୁରକ୍ଷା ଯୋଗାଇବାରେ ସହାୟତା କରିବ।
ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ଏହି ଅତ୍ୟାଧୁନିକ ସିଷ୍ଟମ ବିମାନ, ଡ୍ରୋନ୍, ହେଲିକପ୍ଟର ଓ କ୍ରୁଜ୍ ମିସାଇଲ୍ ସହିତ ବିଭିନ୍ନ ବାୟୁ ଆକ୍ରମଣକୁ ପ୍ରତିହତ କରିବାରେ ସକ୍ଷମ। ଏହା ଭାରତର ବହୁ-ସ୍ତରୀୟ ବାୟୁ ପ୍ରତିରକ୍ଷା ବ୍ୟବସ୍ଥାକୁ ଆହୁରି ଶକ୍ତିଶାଳୀ କରିବ।
ଏହା ସହିତ, ପ୍ରତିରକ୍ଷା ମନ୍ତ୍ରଣାଳୟ ଭାରତୀୟ ନୌସେନାର P-8I ସାମୁଦ୍ରିକ ଗୁପ୍ତଚର ବିମାନଗୁଡ଼ିକର ରକ୍ଷଣାବେକ୍ଷଣ ପାଇଁ ବୋଇଂ ଇଣ୍ଡିଆ ଡିଫେନ୍ସ ସହ ୪୧୩ କୋଟି ଟଙ୍କାର ଅନ୍ୟ ଏକ ଚୁକ୍ତି ମଧ୍ୟ ସ୍ୱାକ୍ଷର କରିଛି। ଏହି ପଦକ୍ଷେପ ଦ୍ୱାରା ଦେଶୀୟ ସ୍ତରରେ ରକ୍ଷଣାବେକ୍ଷଣ ବ୍ୟବସ୍ଥାକୁ ଶକ୍ତିଶାଳୀ କରାଯିବ।
ଏହି ଚୁକ୍ତି ଭାରତ-ରୁଷିଆ ରଣନୈତିକ ସହଭାଗୀତାକୁ ଆହୁରି ମଜବୁତ କରିବା ସହିତ ଦେଶର ସୁରକ୍ଷା ବ୍ୟବସ୍ଥାକୁ ନୂଆ ଦିଗ ଦେବାକୁ ସକ୍ଷମ ବୋଲି ମନେ କରାଯାଉଛି।
