ପାଟନା: ବିହାରର ସହରସା ଜିଲ୍ଲାର ମହିଷୀ ବ୍ଲକ ଅନ୍ତର୍ଗତ ବାଲୁଆହା ସରକାରୀ ମଧ୍ୟ ବିଦ୍ୟାଳୟରେ ମଧ୍ୟାହ୍ନ ଭୋଜନ ଖାଇବା ପରେ ୨୫୦ରୁ ଅଧିକ ଛାତ୍ରଛାତ୍ରୀ ଅସୁସ୍ଥ ହୋଇପଡ଼ିଛନ୍ତି। ଘଟଣା ପରେ ସ୍କୁଲ ପରିସରରେ ହଟ୍ଟଗୋଳ ଓ ଆତଙ୍କର ପରିବେଶ ସୃଷ୍ଟି ହୋଇଥିଲା।
ସୂଚନା ଅନୁସାରେ, ଗୁରୁବାର ସକାଳେ ସ୍କୁଲରେ ଭାତ ଓ ଡାଲି ପରିବେଷଣ କରାଯାଇଥିଲା। ଭୋଜନ କରିବାର କିଛି ସମୟ ପରେ ଅନେକ ଛାତ୍ରଛାତ୍ରୀଙ୍କର ପେଟ ବେଦନା, ବାନ୍ତି, ମୁଣ୍ଡ ବୁଲେଇବା ଓ ଅସୁସ୍ଥତା ଦେଖାଦେଇଥିଲା। ଏହାପରେ ସମସ୍ତଙ୍କୁ ତୁରନ୍ତ ମହିଷୀ ସ୍ୱାସ୍ଥ୍ୟ କେନ୍ଦ୍ରକୁ ନେଇ ଚିକିତ୍ସା ଆରମ୍ଭ କରାଯାଇଥିଲା।
ଡାକ୍ତରମାନଙ୍କ କହିବା ଅନୁଯାୟୀ, ଅଧିକାଂଶ ଛାତ୍ରଛାତ୍ରୀଙ୍କ ସ୍ୱାସ୍ଥ୍ୟ ଅବସ୍ଥା ସ୍ଥିର ରହିଛି। କିଛି ଗୁରୁତର ଅସୁସ୍ଥ ଛାତ୍ରଛାତ୍ରୀଙ୍କୁ ସହରସା ସଦର ହସ୍ପିଟାଲକୁ ସ୍ଥାନାନ୍ତର କରାଯାଇଛି।
ଘଟଣା ପରେ ଜିଲ୍ଲା ପ୍ରଶାସନ ଓ ସ୍ୱାସ୍ଥ୍ୟ ବିଭାଗର ଅଧିକାରୀମାନେ ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଖାଦ୍ୟ ନମୁନା ପରୀକ୍ଷା ପାଇଁ ପଠାଯାଇଥିବା ବେଳେ ଖାଦ୍ୟର ଗୁଣବତ୍ତା ନେଇ ଅଭିଭାବକମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
