ଆନନ୍ଦପୁର : ଆନନ୍ଦପୁର ଉପଖଣ୍ଡ ନନ୍ଦିପଦା ଥାନା ମରୈଗାଁ ଛକ ନିକଟରେ ଭାରସାମ୍ୟ ହରାଇ ଏକ ବୋଲେରୋ ଓଲଟି ପଡିବାରୁ ୨ଜଣ ଯତ୍ରୀ ଗୁରୁତର ଆହତ ହୋଇଥିବାବେଳେ ଜଣେ ଶିଶୁର ମୃତ୍ୟୁ ହୋଇଛି । ସ୍ଥାନୀୟ ଲୋକେ ଚିକିତ୍ସା ପାଇଁ ଆହାତଙ୍କୁ ଆନନ୍ଦପୁର ଡାକ୍ତରଖାନାରେ ଭର୍ତ୍ତି କରିଛନ୍ତି । ଖବର ଅନୁଯାୟୀ, ଭଦ୍ରକ ଜିଲ୍ଲା ବାସୁଦେବପୁର ଥାନା ବାରହାପୁର ଗାଁର ଉମାକାନ୍ତ ସାହୁଙ୍କ ପରିବାର ନିଜ ନାତିର ଚୁଟିପକାଇ ଘଟଗାଁ ମା’ ତାରିଣୀଙ୍କ ଦର୍ଶନ କରି ଫେରିବା ବାଟରେ ଏମିତି ଏକ ଦୁର୍ଘଟଣା ଘଟିଥିଲା । ଦୁଇଟି ବୋଲେରୋରେ ଉମାକାନ୍ତଙ୍କ ପରିବାର ଓ ତାଙ୍କ ଝିଅଙ୍କ ପରିବାର ଫେରୁଥିବା ସମୟରେ ଝିଅ, ଜ୍ୱାଇଁ ଓ ନାତି ବସିଥିବା ବୋଲେରୋ ଦୁର୍ଘଟଣା ଗ୍ରସ୍ତ ହୋଇଥିଲା । ମୃତ ଶିଶୁ ପ୍ରିୟବ୍ରତ, ଉମାକାନ୍ତଙ୍କ ଝିଅର ପୁଅ ବୋଲି ଜଣାପଡିଛି । ସୂଚନାରୁ ଜଣାପଡିଛି ଯେ, ଗାଡି ଚଲାଇବା ସମୟରେ ଡ୍ରାଇଭର ଆଖି ଲାଗିଯିବାରୁ ରାସ୍ତକଡରେ ଥିବା ବାଲି ଓ ଚିପ୍ସ ଗଦା ଉପରେ ଗାଡି ଚଢିଯାଇ ଦୁର୍ଘଟଣା ଗ୍ରସ୍ତ ହୋଇଥିଲା ।
