ମୁମ୍ବାଇରେ ରକେଟ୍ ବାଣ ଫୁଟାଇବା ଉପରେ କଟକଣା, ନଭେମ୍ବର ୨୫ ଯାଏଁ ଲାଗୁ ହେଲା ନିଷେଧାଦେଶ
ମୁମ୍ବାଇ: ଦୀପାବଳିରେ ବାଣ ଫୁଟାଇବା ଯୋଗୁଁ ଅଗ୍ନିକାଣ୍ଡ ଘଟଣା ବଢ଼ିବା ପରେ ବଡ଼ ପଦକ୍ଷେପ ନେଇଛି ବୃହନ୍ମୁମ୍ବାଇ ମ୍ୟୁନିସିପାଲ୍ କର୍ପୋରେସନ୍ (BMC)। ସହରରେ ରକେଟ୍ ଓ ଆକାଶକୁ ଉଡ଼ୁଥିବା ଏରିଆଲ୍ ବାଣ ଫୁଟାଇବା ଉପରେ ସମ୍ପୂର୍ଣ୍ଣ କଟକଣା ଲଗାଯାଇଛି। ନଭେମ୍ବର ୯ରୁ ଲାଗୁ ହୋଇଥିବା ଏହି ନିଷେଧାଦେଶ ନଭେମ୍ବର ୨୫ ରାତି ୧୧ଟା ୫୯ ମିନିଟ୍ ପର୍ଯ୍ୟନ୍ତ ବଳବତ୍ତର ରହିବ।
BMC କମିଶନର ପ୍ରାଜକ୍ତା ଲବଙ୍ଗାରେ-ବର୍ମା ଏହି ଆଦେଶ ଜାରି କରିଛନ୍ତି। ଏହା ମୁମ୍ବାଇ ମହାନଗର ନିଗମ ଅଞ୍ଚଳର ସମସ୍ତ ସରକାରୀ ଓ ବ୍ୟକ୍ତିଗତ ସ୍ଥାନରେ ଲାଗୁ ହେବ। ଘରର ଛାତ, ବାଲକୋନି, ଅଗଣା, ପାର୍କିଂ ସ୍ଥାନ ଓ ବସ୍ତି ଅଞ୍ଚଳରେ ମଧ୍ୟ ରକେଟ୍ ବାଣ ଫୁଟାଇବାକୁ ଅନୁମତି ମିଳିବ ନାହିଁ।
ନଭେମ୍ବର ୮ରେ ମୁମ୍ବାଇ ଫାୟାର ବ୍ରିଗେଡ୍କୁ ଅଗ୍ନିକାଣ୍ଡ ସମ୍ପର୍କିତ ୧୪୨ଟି କଲ୍ ଆସିଥିଲା। ସେଥିମଧ୍ୟରୁ ୧୩୭ଟି ବାଣ ଫୁଟାଇବା ଯୋଗୁଁ ଘଟିଥିବା ଅଭିଯୋଗ ହୋଇଛି। ଡୋଙ୍ଗରୀ ଓ ବିଦ୍ୟାବିହାର ସମେତ ଅନେକ ସ୍ଥାନରେ ଅଗ୍ନିକାଣ୍ଡ ଘଟିଥିଲା।
ରକେଟ୍ ବାଣର ଜଳନ୍ତା ଅଂଶ କୋଠାର ଛାତ, ବାଲକୋନି ଓ ଝରକାରେ ପଡ଼ି ନିଆଁ ଲଗାଇବାର ଆଶଙ୍କା ଥିବାରୁ ଏହି ପଦକ୍ଷେପ ନିଆଯାଇଛି। ତେବେ ଅନ୍ୟ ପ୍ରକାର ବାଣ ଉପରେ ଏହି ନୂଆ କଟକଣା ଲାଗୁ ହୋଇନାହିଁ। ସେଗୁଡ଼ିକର ବ୍ୟବହାର ପୂର୍ବରୁ ଥିବା ଆଇନ ଓ ଅଦାଲତଙ୍କ ନିର୍ଦ୍ଦେଶ ଅନୁସାରେ ନିୟନ୍ତ୍ରିତ ହେବ।
