ମଦୁରାଇ: ତାମିଲନାଡୁରେ ନବଜାତ ଶିଶୁଙ୍କ ପାଇଁ ‘ଥାଇ ମାମନ୍ ଗୋଲ୍ଡ ରିଙ୍ଗ୍ ସ୍କିମ୍’ ଆରମ୍ଭ ହୋଇଛି। ସୋମବାର ମଦୁରାଇର ସରକାରୀ ରାଜାଜୀ ହସ୍ପିଟାଲରେ ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟ ଏହି ଯୋଜନାର ଶୁଭାରମ୍ଭ କରି ନବଜାତ ଶିଶୁମାନଙ୍କୁ ୧ ଗ୍ରାମର ସୁନା ମୁଦି ପ୍ରଦାନ କରିଥିଲେ।
କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ପ୍ରଥମେ ତିନି ଜଣ ଶିଶୁଙ୍କ ଆଙ୍ଗୁଠିରେ ନିଜ ହାତରେ ସୁନା ମୁଦି ପିନ୍ଧାଇଥିଲେ। ପରେ ଅଡିଟୋରିୟମ୍ରେ ଥିବା ଅନ୍ୟ ୧୨ଟି ପରିବାରକୁ ଭେଟି ଶିଶୁମାନଙ୍କୁ ମୁଦି ପ୍ରଦାନ କରିଥିଲେ। କିଛି ଅଭିଭାବକ ନିଜ ଶିଶୁଙ୍କ ନାମକରଣ ପାଇଁ ତାଙ୍କୁ ଅନୁରୋଧ କରିଥିଲେ। ବିଜୟ ଶିଶୁମାନଙ୍କୁ କୋଳରେ ଧରି ପାରମ୍ପରିକ ଢଙ୍ଗରେ ପ୍ରତ୍ୟେକ ନାମ ତିନିଥର ଉଚ୍ଚାରଣ କରିଥିଲେ।
ପରେ ସେ ହସ୍ପିଟାଲର ସମନ୍ୱିତ ଶିଶୁ ବିକାଶ ୱାର୍ଡକୁ ଯାଇ ଆଉ ୧୦ ଜଣ ନବଜାତକଙ୍କୁ ସୁନା ମୁଦି ପ୍ରଦାନ କରିଥିଲେ। ସରକାରୀ ହସ୍ପିଟାଲରେ ଜନ୍ମ ନେଉଥିବା ଶିଶୁଙ୍କୁ ୧ ଗ୍ରାମର ସୁନା ମୁଦି ଦେବା ଏହି ସରକାରୀ ଯୋଜନାର ଉଦ୍ଦେଶ୍ୟ।
ମଦୁରାଇ ଗସ୍ତରେ ମୁଖ୍ୟମନ୍ତ୍ରୀ ପ୍ରାୟ ୧୧ଟାରେ ବିମାନବନ୍ଦରରେ ପହଞ୍ଚିଥିଲେ। ତାଙ୍କୁ ସ୍ୱାଗତ କରିବାକୁ ବହୁ ସମର୍ଥକ ଏକାଠି ହୋଇଥିଲେ। ରାଜାଜୀ ହସ୍ପିଟାଲ ଯିବା ରାସ୍ତାରେ ବିଭିନ୍ନ ସ୍ଥାନରେ ଲୋକେ ତାଙ୍କୁ ସ୍ୱାଗତ କରିଥିଲେ।
